სოფელ რუსთავში, ხანძრის შედეგად, ხუთსულიანი ოჯახი უსახლკაროდ დარჩა [Photo]

შემთხვევა სოფელ რუსთავში გუშინ, 5 ოქტომბერს, გვიან ღამით მოხდა. ლომიძეების საცხოვრებელ სახლს ცეცხლი მაშინ გაუჩნდა, როცა ოჯახის სახლში მყოფ წევრებს ეძინათ.

„ქმარი სახლში არ იყო, ჩვენ გვეძინა, შვილმა გამაღვიძა, დედა, ცუდი სუნი დგასო. შუქი ვერ ავანთე, ჩამქრალი იყო, ფანჯარაში გავიხედე და ცეცხლის ალში იყო სახლი გახვეული. ბავშვები ფანჯრიდან გადმოვიყვანე“, – იხსენებს მედეა ლომიძე.

მედეა ლომიძის თქმით, სახლთან ერთად ჩაიწვა ძროხების გაყიდვიდან მიღებული 3.000 ლარი, რომლითაც ლომიძეები სახლის შეკეთებას აპირებდნენ და ოჯახის კუთვნილი ძვირფასეულობა. ლომიძეებმა ცეცხლს საღამურებით გამოასწრეს: „ტანსაცმლის მოძებნის დროც აღარ იყო“.

ხმაურზე შეკრებილმა მეზობლებმა ლომიძეების ცეცხლმოდებული სახლიდან მხოლოდ ერთი საწოლის გამოტანა მოასწრეს. ადგილზე დილამდე მუშაობდნენ ასპინძისა და ახალციხის სახანძრო სამსახურები.

დილით შემთხვევის ადგილი ასპინძის მუნიციპალიტეტის გამგეობის ინფრასტრუქტურის სამსახურის წარმომადგენლებმა მოინახულეს. როგორც ადგილობრივ ხელისუფლებაში აცხადებენ, დაზარალებულებს მაქსიმალურად დაეხმარებიან: „მინიმუმ 1500 ლარის ღირებულების საშენ მასალებს შევუძენთ, შესაძლოა, მეტიც შევძლოთ“.

სოფელ რუსთავში იმყოფებოდა ასპინძის მაჟორიტარი დეპუტატი, საპარლამენტო უმცირესობის წევრი ტარიელ ლონდარიძეც.

ხანძრის გამომწვევი მიზეზი ჯერ უცნობია, ოჯახის წევრები ფიქრობენ, რომ ცეცხლი ელექტროსადენებიდან გაჩნდა.

„გაზი არაა, ღუმელი ან ცეცხლი არ მენთო, ელექტროტექნიკა ყველაფერი გამორთული მქონდა. ალბათ დენისგან გაჩნდა, რადგან რომ გავიღვიძეთ და ჩავრთე, შუქი გათიშული იყო“, – ვარაუდობს მედეა ლომიძე.

ადგილზე ამ დრომდე მუშაობენ ექპერტ –კრიმინალისტები.







[თინათინ ზაზაძე, ნინო ნარიმანიშვილი, ასპინძა]