ხანძარი მოხეში – შვიდსულიანი ოჯახი საცხოვრებლის გარეშე დარჩა

როგორც ადგილობრივებმა "სამხრეთის კარიბჭეს" განუცხადეს, მოხეში ხანძარი დაახლოებით ღამის პირველ საათზე გაჩნდა. ცეცხლი სწრაფად აალდა და მისი ლოკალიზება გაჭირდა. სახანძრო სამსახური და ადგილობრივები ცეცხლის ჩაქრობას დილამდე ცდილობდნენ.

"მთლად განადგურდა, თავისი საცხოვრებელი სახლით, უძრავ–მოძრავი ქონებით, საქონლის სადგომით. კვამლისგან დაიხოცა შინაური პირუქტყვი. კაპიტალური სახლი იყო, კარგად გაკეთებული და მარტო კედლებია დარჩენილი", – ამბობს შავაძეების მეზობელი ოთარ მიქელაძე.

ადგილობრივები ამბობენ, რომ სახანძრო მანქანა ადგილზე დროულად მივიდა.

"ჩვენ პირობებში თავის დროზე მოვიდა, ადიგენიდან 112 კილომეტრია, გრუნტიანი გზაა და რომ დავურეკეთ, დროულად მოვიდა"– ამბობს ოთარ მიქელაძე.

შემთხვევის ადგილზე ამ წუთებში ადიგენის მუნიციპალიტეტის გამგებელი და მისი მოადგილე იმყოფებიან. მოხეში მუშაობს "სამხრეთის კარიბჭეს" ჟურნალისტიც. შავაძეების შესახებ ინფორმაციას მოგვიანებით მოგაწვდით.





[თამარ თოთაძე, ადიგენი]