ეროვნული სატყეო სააგენტოს ინფორმაციით, ბორჯომში 6 ჰექტრამდე ტყე დაიწვა

მეხანძრეებსა და მაშველებთან ერთად ცეცხლის ჩაქრობას ცდილობს ადგილობრივი მოსახლეობა. ეროვნულ სატყეო სააგენტოში აცხადებენ, რომ ხანძარი ლოკალიზებულია, მისი ლიკვიდაცია კი ხვალისთვის უკევე შესაძლებელი იქნება.

რა ფართობზე გავრცელდა ხანძარი და დაახლოებით რამდენი ჰექტარი ტყე დაიწვა, ამასთან დაკავშირებით მთელი დღის განმავლობაში ურთიერთგამომრიცხავი ინფორმაცია ვრცელდებოდა. ადგილობრივები აცხადებდნენ, რომ დაახლოებით 20 ჰექტრამდე ტყე დაიწვა, თუმცა მუნიციპალიტეტის გამგებელი დიმიტრი ყიფიანი ამ ფაქტს კატეგორიულად უარყოფს. მისი თქმით, ხანძრის შედეგად დაალოებით 6–დან 8 ჰექტრამდე ფართობზეა დამწვარი ტყე.

ეროვნული სატყეო სააგენტოში აცხადებენ, რომ ხანძარმა ტყის მასივი დაახლოებით 6 ჰექტარ ფართობზე გაანადგურა.

„ცეცხლი უკვე ჩაქრობისკენ მიდის.სააგენტოს თანამშრომლები აცხადებენ, რომ ხვალ, დაახლოებით შუადღისთვის, თბილისიდან ვინც კი იყო გამოძახებული, ყველა წავა. დამატებითი ძალების გამოძახება საჭირო აღარ არის“, – ამბობს ეროვნული სატყეო სააგენტოს პრესსამსახურის წარმომადგენელი ანი ანდრონიკაშვილი.

„ხვალისთვის სრულიად ჩააქრობენ კერებს“, – ირწმუნება ბორჯომის მუნიციპალიტეტის გამგებელიც.

ხანძრის ადგილზე დღეს იმყოფებოდნენ სამცხე–ჯავახეთის გუბერნატორი აკაკი მაჭუტაძე და ადგილობრივი თვითმმართველობის წარმომადგენლები.

გუბერნატორის განმარტებით, ხანძრის გავრცელების საშიშრობა აღარ არსებობს, რადგან მეხანძრეებმა ცეცხლს გარშემო შემოუბარეს და გავრცელების საშუალება არ მისცეს.

შეგახსენებთ, რომ ბორჯომში, ტყეში ხანძარი ორი დღის წინ გაჩნდა.

შსს–ს ინფორმაციით, რეგიონის სახანძრო-სამაშველო სამსახურის ბრიგადების გარდა ადგილზე მობილიზებული იყვნენ ქარელის, კასპის, გორის, ხარაგაულის და ხაშურის სახანძრო სამსახურების თანამშრომლები. ხანძრის ჩაქრობის პროცესში სულ მონაწილეობდა 6 სახანძრო-სამაშველო მანქანა და 150-ზე მეტი მეხანძრე-მაშველი. თბილისიდან ხანძრის ქრობის განყოფილებიდან დამატებით 5 კაციანი ჯგუფი გაიგზავნა. ხანძრის შედეგად არავინ დაშავებულა.

[თინათინ ზაზაძე, ბორჯომი]