კოდიანის ტყეში ხანძარი ლიკვიდირებულია

ეროვნული სატყეო სააგენტოს სამცხე- ჯავახეთის სატყეო სამსახურის თანამშრომლებმა ბორჯომი–ასპინძის დამაკავშირებელ მონაკვეთზე, კოდიანის ტყეში ხანძრის ლიკვიდირება მოახერხეს.

"მეხანძრეები მესამე დღეა 24 საათის განმავლობაში ბორჯომი-ასპინძის დამაკავშირებელ მონაკვეთზე, კოდიანის ტყეში გაჩენილ ხანძარს ებრძვიან. მიუხედავად იმისა, რომ ხანძარი მიუდგომელ ადგილზეა გაჩენილი ამ დროისთვის ის ლიკვიდირებულია. წინასწარი მონაცემებით დამწვარია 5-6 ჰექტარი ტყის მასივი. ადგილზე ამ დრომდე რჩებიან ეროვნული სატყეო სააგენტოს, სამცხე-ჯავახეთის სატყეო სამსახურის თანამშრომლები", – განმარტავენ გარემოს დაცვის სამინისტროში.

შეგახსენებთ, რომ ბორჯომში, ტყეში ხანძარი სამი დღის წინ გაჩნდა.

შსს–ს ინფორმაციით, რეგიონის სახანძრო-სამაშველო სამსახურის ბრიგადების გარდა ადგილზე მობილიზებული იყვნენ ქარელის, კასპის, გორის, ხარაგაულის და ხაშურის სახანძრო სამსახურების თანამშრომლები. ხანძრის ჩაქრობის პროცესში სულ მონაწილეობდა 6 სახანძრო-სამაშველო მანქანა და 150-ზე მეტი მეხანძრე-მაშველი. თბილისიდან ხანძრის ქრობის განყოფილებიდან დამატებით 5 კაციანი ჯგუფი გაიგზავნა. ხანძრის შედეგად არავინ დაშავებულა.

[თამარ თოთაძე, ბორჯომი]