ბორჯომ–ხარაგაულის ეროვნულ პარკში ხანძრის ლოკალიზება უჭირთ

ბორჯომ–ხარაგაულის ეროვნული პარკის მიმდებარე ტერიტორიაზე ხანძრის ჩაქრობას მეხანძრეებთან და რეინჯერებთან ერთად ახალციხის მუნიციპალიტეტის გამგეობის თანამშრომლები და ადგილობრივი მოსახლეობა ცდილობს.

ახალციხის სახანძრო–სამაშველო სამსახურის უფროსის პაატა კბილაშვილის განმარტებით, ხანძრის შედეგად დაახლოებით 2 ჰექტრამდეა დამწვარი. რთული რელიეფის გამო ცეცხლის ჩაქრობა ნიჩბებით უწევთ.

„ღია ცეცხლი არ არის. ხჩოლვა მიდის ტყეში, ნეშომპალა იწვის. გარშემო გალავანი დავარტყით, რადგან ცეცხლს გავრცელების საშუალება არ მივცეთ“, – ამბობს პაატა კბილაშვილი.

ადგილზე მობილიზებული არიან სახანძრო-სამაშველო სამსახური, პოლიცია, გარემოსდაცვითი ზედამხედველობის დეპარტამენტის თანამშრომლები, მეტყევეები და ბორჯომ-ხარაგაულის ეროვნული პარკის რეინჯერები.

შეგახსენებთ, რომ ბორჯომ–ხარაგაულის ეროვნულ პარკში, წინუბანი-აწყურის მონაკვეთთან ხანძარი გუშინ, 7 სექტემბერს დაახლოებით 14:00 საათისთვის გაჩნდა. ხანძრის გავრცელების სავარაუდო მიზეზად დაუდევრობა სახელდება.

[თინათინ ზაზაძე, ახალციხე]