ხმაური ადიგენში – რისთვის აპირებს საკრებულო კვალიფიციური იურისტის დაქირავებას?

დღეს, 17 სექტემბერს, ადიგენის მუნიციპალიტეტის საკრებულოს რიგგარეშე სხდომა, რომელზეც კვალიფიციური იურისიტის დაქირავების საკითხს განიხილავდნენ, ხმაურით წარიმართა.

აზრთა სხვადასხვაობა გამოიწვია საკრებულომ ინიციატივამ კვალიფიციური იურისტის აყვანის თაობაზე, რომელიც ლევან ლობჯანიძის საქმეზე ახალციხის რაიონული სასამართლოს განაჩენს გაასაჩივრებს და საკრებულოს ინტერესებს დაიცავს. საკრებულოს უმცირესობა ფიქრობს, რომ ეს ბიუჯეტი არამიზნობრივი ხარჯვაა, მითუმეტეს მაშინ, როცა საკრებულოს იურისტი ისედაც ჰყავს.

საკრებულოს თავმჯდომარე იმედა მღებრიშვილი ინიციატივას იმ არგუმენტით ამყარებს, რომ საკრებულოს იურისტს საკმარისი კვალიფიკაცია არ აქვს.

თუ ადიგენის საკრებულო საქმეს ბოლო ინსტანციაშიც წააგებს, ბიუჯეტს საკმაოდ დიდი ოდენობით ხარჯი დააწვება: საკრებულოს მოუწევს ლევან ლობჯანიძეს იძულებით განაცდური საათების ღირებულება აუნაზღაუროს, გადაიხადოს ადვოკატის ჰონორარი და ამის პარალელურად, ამ ხნის განმავლობაში ხელფასი უნდა აიღოს მოქმედმა საკრებულოს თავმჯდომარემაც.

თავად ლევან ლობჯანიძემ, რომლის საკითხის განხილვასაც ხმაური მოჰყვა, სხდომა დატოვა. მან განაცხადა, რომ მისი დარჩენა ამ სხდომაზე უხერხულია. სხდომა დატოვა „გაერთიანებული დემოკრატიული მოძრაობის“ წევრმა, დეპუტატმა მალხაზ ბოჩიკაშვილმაც.

საბოლოოდ, საკითხი დადებითად გადაწყდა. უმრავლესობამ გადაწყვიტა, რომ იურისტი დაიქირაონ.

ადიგენში მიმდინარე სხდომას ესწრება „სამხრეთის კარიბჭეს“ ჟურნალისტი. თვალი ადევნებთ ვებგვერდს.

[Sknews.ge]