ახალციხეში ევროკავშირთან თავისუფალი ვაჭრობის შეთანხმების შესახებ იმსჯელეს

დღეს, 15 სექტემბერს ახალციხის ციხის საკონფერენსიო დარბაზში სემინარი გაიმართა თემაზე „საქართველოს პერსპექტივა ევროკავშირთან ღრმა და ყოვლისმომცველი თავისუფალი ვაჭრობის შეთანხმების შესახებ“.

შეხვედრის ძირითადი ასპექტები იყო ღრმა და ყოვლისმომცველი თავისუფალი ვაჭრობის პოტენციური გავლენა საქართველოზე და საქონლით ვაჭრობა; სურსათის უვნებლობასთან დაკავშირებული საკითხების მოწესრიგების პერსპექტივა; სანიტარულ და ფიტოსანიტარულ ღონისძიებებს დაქვემდებარებული პროდუქციით ვაჭრობის მოთხოვნები ევროკავშირში; ტექნიკური ბარიერები ვაჭრობაში; ინტელექტუალური საკუთრების დაცვა.

სემინარზე ძირითადად ორ მთავარ საკითხზე გაამახვილეს ყურადღება, ეს არის გეოგრაფიული ადგილმდებარეობის განსაზღვრა პროდუქციის წარმოების დროს და სურსათის უვნებლობა.

„პრობლემები ამ დარგში მთელს მსოფლიოშია, რადგან დღითი–დღე იზრდება ვაჭრობა მსოფლიოში და მათ შორის საქართველოს და ევროკავშირს შორის. ამიტომ ბუნებრივია, რომ ჩვენ მეტი ყურადღება უნდა მივაქციოთ იმ სფეროს, რომელიც ასე მნიშვნელოვანია საქართველოსა და ევროკავშირისთვის“, – ამბობს ევროკავშირის წარმომადგენლობა საქართველოს ვაჭრობის მენეჯერი ანტონია ლოპარკო და ამატებს, რომ ამ ხელშეკრულების საშუალებით ევროკავშირი საქართველოს საშუალებას აძლევს ყოველგვარი შეზღუდვების გარეშე ივაჭროს ევროკავშირთან.

მისივე თქმით, დიდი ყურადღება უნდა მიექცეს სურსათის უვნებლობასაც, რადგან ეს საკითხი ეხება ნებისმიერ მოქალაქეს – „საკვების უსაფრთხოება ყველა ჩვენგანისთვის მნიშვნელოვანია“.

ინტელექტუალური საკუთრების ეროვნული ცენტრის, საქპატენტის თავმჯდომარე ნიკოლოზ გოგილიძე ამბობს, რომ დღევანდელ შეხვედრაზე ისაუბრეს თუ რა სახით შეუძლიათ გამოიყენონ ფერმერებმა და მეწარმეებმა ინტელექტუალური საკუთრების ის ობიექტები, რომელებიც მათ შეუძლიათ შექმნან ევროპის ბაზარზე თავის დასამკვიდრებლად.

„ძირითადად, აქ საუბარი ეხება გეოგრაფიული აღნიშვნების სისტემას. ეს მათ საშუალებას აძლევს, რომ ამ ობიექტის დაცვით ევროპელ მომხმარებელს მიანიშნოს იმაზე, რომ მისი პროდუქცია არის უნიკალური, განსხვავებული. ეს შესაბამისად გამოიწვევს ინტერესს ამ პროდუქციის მიმართ“, – ამბობს ნიკოლოზ გოგილიძე.

სემინარი ევროკავშირის წარმომადგენლობა საქართველოს და პროექტის „ერთად შევეგებოთ ევროპას“ ორგანიზებით გაიმართა.



[თამარ თოთაძე, ახალციხე]