ფერმერები პროდუქტის წარმოების ევროსტანდარტებს გაეცნენ

შეხვედრა დღეს, 25 სექტემბერს, ასოციაცია "ტოლერანტის" ორგანიზებით გაიმართა. მის მიზანს საინფორმაციო რესურს– მაგიდების შესახებ ინფორმაციით გავრცელება წარმოადგენდა.

აღნიშნული რესურს–მაგიდები "ტოლერანტის" ბაზაზე გაიხსნა და მათი მეშვეობით ფერმერებს, კოოპერატივებსა და დაინტერესებულ პირებს შეუძლიათ მეტი ინფორმაცია მიიღონ ევროპასთან თავისუფალი ვაჭრობის შესახებ, თუ რა საფეხურების გავლა მოუწევს მწარმოებელს იმისათვის, რომ მისი პროდუქტი ევროპის ბაზარზე მოხვდეს.

"ჩვენ მოგაწოდებთ მაქსიმალურ ინფორმაციას, რომ თქვენ ნელ– ნელა თქვენი პროდუქტი და საწარმოები გარდაქმნათ ევროკავშირის სტანდარტების შესაბამისად და შეძლოთ ბაზრის ათვისება",– განმარტა შეხვედრისას საინფორმაციო რესურს მაგიდის კოორდინატორმა თამარ სამსონიძემ.

მისივე თქმით, ევროპული ბაზრის ასათვისებლად, ფერმერს არაერთი კომპონენტის გათვალისწინება მოუწევს, როგორც ლაბორატორიული შემოწმებების, ასევე მწარმოებელი ქარხნის ადგილმდებარეობასთან დაკავშირებით.

"იწყება ადგილმდებარეობის შესწავლა, რადგან შეიძლება ქარხნისათვის ესა თუ ის ადგილი არახელსაყრელია, რადგან აქ ადრე ქიმიური დაბინძურება ხდებოდა, ეს კი პროდუქტზე აისახება. ასევე, ყურადღება გამახვილდება პროდუქტის მოყვანის შესახებ, მაგალითად, შეწამვლის წესს როგორ იცავს ფერმერი, აღების პერიოდში სად ათავსებს პროდუქციას და ა.შ.", – განმნარტავს თამარ სამსონიძე.

შეხვედრას რეგიონში მომუშავე ფერმერები, კოოპერატივებისა და თვითმმართველობების წარმომადგენლები ესწრებოდნენ.

"ჩვენ მოგვყავს კარტოფილი, ვაწარმოებთ ყველსაც, რძის საწარმოც გვაქვს. კარგი იქნება თუ ჩვენს ნაწარმს ევროპაში გავიტანთ. მინდა, რომ ყველა საფეხური გავიარო, რათა ჩემმა პროდუქტმა ევროსტანდარტები დააკმაყოფილოს", – ამბობს სოფელ მოხეში მდებარე რძის საწარმო "იმედი"–ის თანამშრომელი ბადრი ბერიძე.

საინფორმაციო შეხვედრა, ევროკავშირისა და ჩეხეთის განვითარების სააგენტოს მიერ მხარდაჭერილი პროექტის "რეგიონული სამოქალაქო ორგანიზაციები ევროპასთან თავისუფალი ვაჭრობის მხარდასაჭერად" ფარგლებში გაიმართა.



[მარიამ ბარძიმაძე, ახალციხე]