ფერმერები თავისუფალი ვაჭრობის შესახებ კონსულტაციებს მიიღებენ

25 აპრილს, ევროპასთან თავისუფალი ვაჭრობის (DCFTA) შესახებ, საინფორმაციო რესურს–მაგიდების გახსნის ღონისძიება გაიმართა. რესურს–მაგიდები, ასოციაცია "ტოლერანტში" და "რეგიონული განვითარების სააგენტოს" ეგიდით, ახალციხის საკრებულოს შენობაში განთავსდა.

რესურს –მაგიდების დახმარებით, ფერმერებს შესაძლებლობა ექნებათ ევროპულ ბაზართან წვდომისათვის, მათთვის საინტერესო და საჭირო ინფორმაცია მიიღონ.

პროექტს ახორციელებს ჩეხური ორგანიზაცია "People in Need" და მისი პარტნიორები: სოფლად თემთა განვითარების სააგენტო, PMC კვლევითი ცენტრი, ასოციაცია "ათინათი" და საქართველოს სოფლის მეურნეობისა და სოფლად განვითარების ალიანსი.
პროექტის მთავარი მიზანია, ევროკავშირის ზონაში საქართველოს ინტეგრაცია მოხდეს.

"ეს საინფორმაციო რესურს–მაგიდები ჩვენ მიერ აღჭურვილნი არიან ტექნიკით, ავეჯითა და სხვა საჭირო ნივთებით. ფაქტობრივად, მზად არიან, რომ ფერმერებისათვის იყვნენ საინფორმაციო–საკონსულტაციო რესურსი. დაეხმარონ მათ იმისათვის, რომ კარგი პროდუქცია მოიყვანონ და ეს პროდუქცია შესაბამისობაში იყოს ევროპასთან თავისუფალი ვაჭრობისათვის", – განმარტავს "People in Need"-ის პროექტის მენეჯერი ზაალ ანჯაფარიძე.

მისივე განმარტებით, პროექტის ფარგლებში, ორგანიზაცია ხელს შეუწყობს, რომ ფერმერები ჩაერთონ ადვოკატირების პროცესში იმ საკითხებზე, რომლებიც უკავშირდება მცირე და საშუალეო მეწარმეობასთან დაკავშირებული პრობლემების მოგვარებას. ასევე ამ პრობლემატიკის მიტანას ცენტრალური ხელისუფლებამდე.

პროექტის სამიზნე რეგიონებია აჭარა, სამეგრელო-ზემო სვანეთი, იმერეთი, სამცხე-ჯავახეთი, კახეთი, მცხეთა-მთიანეთი და ქვემო ქართლი.







[თაკო ფეიქრიშვილი, ახალციხე]