სასწავლო პროცესი ახალციხის ყველა სკოლაში განახლდა

ქალაქ ახალციხისა და ახალციხის მუნიციპალიტეტის სკოლებში წელს 525 პირველკლასელია. აქედან 344 ქალაქში, 181 კი სოფლებში. ყველა პირველკლასელს საჩუქრად ნეთბუქები გადაეცათ. ახალცხის მუნიციპალიტეტის გამგეობამ, მუნიციპალიტეტის მასშტაბით ყველა პურველკლასელს საჩუქრად საკანცელარიო ნივთები გადასცა. საჩუქრებისთვის ადგილობრივი ბიუჯეტიდან 1800 ლარი გამოიყო.

„სკოლა მომზადებული ხვდება ახალ სასწავლო წელს. ბავშვთა რაოდენობა წინა წლებთან შედარებით გაიზარდა და ამჟამად 262 მოწავლე გვყავს. მინდა ყველა მოსწავლეს წარმატება ვუსურვო“, – ამბობს მეექვსე საჯარო სკოლის დირექტორი გია კაპანაძე.

ქალაქის სკოლებში ახალი სასწავლო წლის დაწყება მოსწავლეებს ახალციხის საგანმანათლებლო რესურსცენტრის ხელმძღვანელმა ხათუნა ხმალაძემ და ადგილობრივი თვითმმართველობის წარმომადგენლებმა მიულოცეს.

„მინდა ყველას მივულოცო ახალი სასწავლო წლის დაწყება და სწავლაში წარმატებები ვუსურვო. ახალციხესა და თემში 38 საჯარო და ერთი კერძო სკოლაა ყველა სკოლა სასწავლო პროცესისთვის მზად არის“, – ამბობს ახალციხის საგანმანათლებლო რესურსცენტრის უფროსი ხათუნა ხმალაძე.

სასწავლო პროცესი განახლდა ახალციხის პირველ საჯარო სკოლაშიც, სადაც სკოლის შენობის რემონტი იყო დაგეგმილი, თუმცა ტენდერის ჩაშლის გამო დროებით გადაიდო.

[თინათინ ზაზაძე, ახალციხე]