ახალციხეში ახალი სასწავლო წელი ყველა სკოლაში დაიწყო

ახალი სასწავლო წელი ახალციხის მუნიციპალიტეტის ყველა საჯარო და კერძო სკოლაში დღეს დაიწყო. სასწავლო წლის დაწყება ახალციხის შოთა რუსთაველის სახელობის პირველ საჯარო სკოლაში წარმატებული მოსწავლეების დაჯილდოებით აღნიშნეს.

"ეროვნულ სასწავლო ოლიმპიადაში ფინალში გასვლისთვის პეტრე მერაბიშვილი დაჯილდოვდა. ასევე დაჯილდოვდნენ მესამე ტურში გასული ბავშვებიც.მოსწავლეებს 100 პროცენტიანი გრანტის მოპოვებისთვისაც სიგელები გადაეცათ",- ამბობს პირველი საჯარო სკოლის დირექტორი მაკა ჯანაშვილი.

ახალი სასწავლო წლის დაწყება მოსწავლეებს ადგილობრივი თვითმმართველობისა და ახალციხის საგანმანათლებლო რესურსცენტრის წარმომადგენლებმაც მიულოცეს.

პირველ საჯარო სკოლას წელს 70 პირველკლასელი ჰყავს. მოსწავლეებს ნეთბუქები და ახალი სახელმძღვანელოები მერხებზე დახვდათ.
წინა წლებისგან განსხვავებით წელს მოსწავლეები სახელმძღვანელოებს უფასოდ მიიღებენ.

"სიახლით ძალიან კმაყოფილი ვარ.ჩემი ორივე შვილი სკოლის მოსწავლეა და ძალიან რთული იყო ყოველ წელს ახალი სახელმძღვანელოების ყიდვა, ხშირად ვერც ვშოულობდით დროულად. ახლა ასეთი პრობლემა აღარ გვექნება, მადლობის მეტი არაფერი გვეთქმის",- ამბობს თამარ ზაზაძე.

ახალციხის მუნიციპალიტეტის საჯარო სკოლებში წელს სულ 466 პირველკლასელია.

[თინათინ ზაზაძე, ახალციხე]