ქალაქ ახალციხის სკოლებში 366 პირველკლასელი მივიდა

სწავლა, დილით 9:00 საათზე დაიწყო, კორონავირუსის გამო სკოლებში მშობლები არ შეუშვეს, მოსწავლეები ადმინისტრაციის წარმომადგენლებმა თერმოსკრინინგის გავლის შემდეგ შეიყვანეს.

განათლების სამინისტროს რეკომენდაციების მიხედვით, ქალაქის რამდენიმე სკოლაში ე.წ ჰიბრიდული მოდელით იმუშავებენ. მაღალ კლასებში მოსწავლეების ნაწილს გაკვეთილების ნაწილი დისტანციურად ჩაუტარდება.

ახალციხის მეშვიდე საჯარო სკოლაში დისტანციურად 5 ოქტომბრამდე ისწავლიან. აქ დათბუნებისა და სავენტილაციო სისტემის მოწყობის სამუშაოების გამო, სწავლა საკლასო ოთახებში ვერ განახლდა. დაწესებულებაში, სადაც სსმ პირები სწავლობენ, ორი პირველკლასელი მიიღეს.

ახალციხის N1 საჯარო სკოლაში წელს 125 პირველ კლასელი ჰყავთ. უსაფრთხოების მიზნით, მოსწავლეები რამდენიმე შესასვლელით ისარგებლებენ.

125 პირველკლასელი მიიღეს მეხუთე საჯარო სკოლაშიც, სწავლა აქაც საკლასო ოთახებში აღდგა.

N2 საჯარო სკოლაში 34 პირველკლასელია. მოსწავლეები შერეული მოდელით ისწავლიან. I-IX კლასელები სკოლაში ივლიან, ხოლო უფროს კლასელებს გაკვეთილების ნაწილი ონლაინ ჩაუტარდებათ.

ახალციხის მეექვსე სკოლაში 25 პირველკლასელი ისწავლის. სკოლაში სწავლა ორ ცვლად განახლდა, I-VI კლასის მოსწავლეებს სწავლა 14:00 საათზე დაეწყებათ, VII-XII კლასელებს კი 09:00 საათზე.

N3 საჯარო სკოლაში სწავლა შერეული მოდელით აღდგა, როგორც საკლასო ოთახებში ისე დისტანციურად. წელს 43 პირველკლასელი ჰყავთ.

კერძო სკოლა „მზექასა“ და ახალციხის N4 საჯარო სკოლაში სწავლა საკლასო ოთახებში აღდგა. მზექაში წელს 10 პირველკლასელი მიიღეს, ხოლო მეოთხეში – ორი.

ახალციხის მერიამ მუნიციპალიტეტში 613 პირველკლასელს საჩუქრად სასკოლო-საკანცელარიო ნივთები გადასცა. განათლების სამინისტრომ კი კომპიუტერები.

ახალციხეში სულ 39 საჯარო და კერძო სკოლაა.

[მარიამ ბარძიმაძე]