ადიგენის გამგეობის დაქირავებულმა ადვოკატებმა სააპელაციოში საქმე წააგეს

თბილისის სააპელაციო სასამართლოში მოსამართლემ გადაწყვეტილება დღეს, 9 თებერვალს გამოაცხადა. სააპელაციო სასამართლომ ახალციხის რაიონული სასამართლოს მოსამართლის მარიკა ჩიტაშვილის გადაწყვეტილება ძალაში დატოვა. „სამხრეთის კარიბჭეს“ ამის შესახებ თბილისის სააპელაციო სასამართლოში დაუდასტურეს.

აღნიშნული გადაწყვეტილებით, ადიგენის მუნიციპალიტეტის საკრებულოს ყოფილი თავმჯდომარის ლევან ლობჯანიძის სარჩელი დაკმაყოფილდა. კერძოდ, სასამართლომ ბათილად ცნო ლობჯანიძის თანამდებობიდან გადაყენების შესახებ საკრებულოს მიერ მიღებული გადაწყვეტილება და დააკმაყოფილა ლობჯანიძის მოთხოვნა თანამდებობაზე აღდგენის შესახებ. გარდა ამისა, ბათილად იქნა ცნობილი ახალი თავმჯდომარის იმედა მღებრიშვილის არჩევის შესახებ საკრებულოს მიერ მიღებული გადაწყვეტილებაც. ასევე, მოსამართლე მარიკა ჩიტაშვილის გადაწყვეტილებით ადიგენის მუნიციპალიტეტის საკრებულომ ლევან ლობჯანიძეს განაცდური საათების ყოველთვიური საფასური უნდა გადაუხადოს.

პირველ ინსტანციაში პროცესის წაგების შემდეგ ადიგენის მუნიციპალიტეტის გამგეობამ გადაწყვიტა მეორე ინსტანციაში საბრძოლველად ადვოკატი დაექირავებინა. ადიგენის მუნიციპალიტეტის საკრებულომ ხელშეკრულება საადვოკატო ბიუროსთან „Ok & CG”-სთან გააფორმა. როგორც ადიგენის მუნიციპალიტეტის საკრებულოს თავმჯდომარე იმედა მღებრიშვილი აცხადებდა, მომსახურებისთვის თვითმმართველობის ბიუჯეტიდან 1 500 ლარი გაიწერა.

აღნიშნული ბიუროდან საქმეში სამი ადვოკატი იყო ჩართული. არც ერთი მათგანი გამოცხადებას არ დასწრებია, თუმცა აცხადებენ, რომ ეს გადაწყვეტილება უსაფუძვლოა და უზენაეს სასამართლოში აუცილებლად გაასაჩივრებენ.

შეგახსენებთ, რომ 2015 წლის 4 მარტს, ადიგენის მუნიციპალიტეტის საკრებულოს სხდომაზე, 17 ხმით 10–ის წინააღმდეგ, დეპუტატებმა ფარული კენჭისყრით საკრებულოს თავმჯდომარე ლევან ლობჯანიძე თანამდებობიდან გადააყენეს. ლობჯანიძე ადგილობრივ ხელისუფლებას უკანონოდ გათავისუფლებაში ადანაშაულებს. მოსარჩელე მხარე ადიგენის მუნიციპალიტეტის საკრებულოს 2015 წლის 4 მარტის სხდომის შედეგებისა და ახალი თავმჯდომარის იმედა მღებრიშვილის არჩევის ბათილად ცნობას ითხოვს.

შეგახსენებთ, ამ დავის საწარმოებლად ადიგენის მუნიციპალიტეტის საკრებულო თავისი იურისტს კვალიფიკაციას არ ენდო და ადვოკატები იქირავა. საკრებულოს ინტერესებს სამი ადვოკატი იცავს. მათ გამგეობა 1500 ლარს უხდის.

[თამუნა უჩიძე, ახალციხე]