მოსამართლის შვებულების გამო, ლევან ლობჯანიძის საქმეზე სასამართლო პროცესი გადაიდო

სხდომის გადადების შესახებ სასამართლომ მოსარჩელე და მოპასუხე მხარეებს წინასწარ შეატყობინა. თუმცა, ლევან ლობჯანიძე 12:00 საათზე სასამართლოზე მაინც გამოცხადდა. მისი თქმით, მოპასუხე მხრიდან რაიმე პროვოკაციას რომ არ ჰქონოდა ადგილი, სასამართლოში ამიტომ მივიდა.

შეგახსენებთ, რომ მიმდინარე წლის 4 მარტს, ადიგენის მუნიციპალიტეტის საკრებულოს სხდომაზე, 17 ხმით 10–ის წინააღმდეგ, დეპუტატებმა ფარული კენჭისყრით საკრებულოს თავმჯდომარე ლევან ლობჯანიძე თანამდებობიდან გადააყენეს. იმავე დღეს დეპუტატებმა საკრებულოს ახალ თავმჯდომარედ, საკრებულოს საფინანსო – საბიუჯეტო, ეკონომიკისა და ქონების მართვის კომისიის თავმჯდომარე, იმედა მღებრიშვილი აირჩიეს.

ლობჯანიძე ადგილობრივ თვითმმართველობას უკანონოდ გათავისუფლებაში ადანაშაულებს და მიაჩნია, რომ მისი თანამდებობიდან გადაყენება პროცედურული დარღვევებით მოხდა.

[თამარ თოთაძე, ახალციხე]