ბორჯომში, სოფელ დვირში, 4 ჰექტარზე ბუჩქნარი იწვის

ფოტო: ტელეკომპანია "ბორჯომი"
ეროვნული სატყეო სააგენტოს სამცხე-ჯავახეთის სატყეო სამსახურის უფროსის სოსო რეხვიაშვილის განმარტებით, ადგილზე მობილიზებულია სამცხე–ჯავახეთის ყველა მუნიციპალიტეტის სახანძრო–სამაშველო სამსახური. მაშველებთან და მეხანძრეებთან ერთად, ცეცხლის ლოკალიზებას ცდილობენ ადგილობრივები. ადგილზე იმყოფებიან სამართალდამცველებიც.

საქართველოს ბუნებრივი რესურსებისა და გარემოს დაცვის სამინისტროში ამბობენ, რომ არსებობს საფრთხე, რომ ცეცხლი გვერდზე მდებარე წიწვოვან მასივსაც მოედოს. ამიტომ, დამატებით ძალად თბილისიდან ვერტმფრენს ელოდებიან.

სამინისტროს ინფორმაციით, დვირში ხანძარი დღეს, 30 ივლისს, შუადღეს გაჩნდა. რამ გამოიწვია ხანძარი, ამ ეტაპზე სამინისტროში რაიმეს თქმა უჭირთ: „შესაძლოა იყოს დაუდევრობა, ჯერ ამაზე საუბარი ძალიან ნაადრევია“.

იქ სადაც ხანძრის კერაა, ქარი არ არის, რაც სამცხე-ჯავახეთის სატყეო სამსახურის უფროსის თქმით, მათ სასარგებლოდ მოქმედებს. თუმცა, სოსო რეხვიაშივლი ფიქრობს, რომ ამაღამ ხანძრის სრული ლოკალიზება ვერ მოხერხდება.

საქართველოს შინაგან საქმეთა სამინისტროს ინფორმაციით, მომხდარზე გამოძიება სსკ-ის 187-ე მუხლით მიმდინარეობს.


ფოტო: ტელეკომპანია "ბორჯომი"


ფოტო: ტელეკომპანია "ბორჯომი"

[ნინო ნარიმანიშვილი, ბორჯომი]