‘9 წლის განმავლობაში მიტოვებული’ მეორე შახტა ‘ოცნებასაც’ დაავიწყდა?!

ვალეში არსებულ „მეორე შახტის“ დასახლებას, უკვე შეცვლილი ხელისუფლება პრობლემების მოგვარებას ჯერ კიდევ 2013 წელს, საპრეზიდენტო არჩევნებამდე ჰპირდებოდა.

2013 წლის 21 ოქტომბერს, ადგილობრივებთან მისული „ქართული ოცნების“ შტაბის წარმომადგენლები აცხადებდნენ, რომ წინა ხელისუფლებას „მეორე შახტა“ 9 წლის განმავლობაში უყურადღებოდ ჰყავდა მიტოვებული. მათი ვარაუდით, ეს ალბათ იმიტომ ხდებოდა, რომ აქ მხოლოდ 300 ამომრჩეველი ცხოვრობს, რომლებსაც სერიოზულ საარჩევნო ხმებად არ აღიქვამდნენ. „ქართული ოცნება“ კი მათ, პირველ რიგში, როგორც მოქალაქეებს, ისე აღიქვამდა და მათი პრობლემების მოსაგვარებლადაც უკვე დაგეგმილი იყო არაერთი პროექტი.

„ამ დასახლებაში ისეთი პრობლემებია, რომელიც შეიძლება მოგვარდეს, თუ ცენტრალური მთავრობა და ადგილობრივი ხელისუფლება ყურადღებას მიაქცევს. მე არაერთხელ ვახსენე და კიდევ ერთხელ მინდა მადლობა ვუთხრა ადგილობრივ ხელისუფლებას, რომ ამ ტერიტორიაზე ბევრი პროექტია დაგეგმილი“, - ეს სიტყვები „ქართული ოცნების“ საარჩევნო შტაბის აქტივის კოორდინატორს გოჩა პარუნაშვილს ეკუთვნის.
სწორედ გოჩა პარუნაშვილი ხვდებოდა ადგილობრივებს 2013 წლის საპარლამენტო არჩევნებამდე ერთი კვირით ადრე.

მაშინდელ შეხვედრაზე, რომელსაც „სამხრეთის კარიბჭეც“ ესწრებოდა (იმ პერიოდში რედაქციას ჰქონდა ფასიანი სარეკლამო შეთანხმება „ქართულ ოცნებასთან“), პარუნაშვილი დარწმუნებით ამბობდა, რომ 9 წლის განმავლობაში გზის თითო მეტრიც რომ გაკეთებულიყო, ამ დასახლებაში სხვა მდგომარეობა იქნებოდა: „სირცხვილია უბრალოდ, რომ ამ ცხრა წლის განმავლობაში ეს ადამიანები იყვნენ მიტოვებული. ამ დასახლებაში 300 ამომრჩეველია და როგორც ჩანს, მთავრობას ეს ხმები არ ანაღვლებდა. ჩვენთვის მხოლოდ ამომრჩევლები არ არიან, ჩვენი მოქალაქეები არიან და პატივი უნდა ვცეთ“.

ახალ (უკვე, 3–წლიანი სტაჟის მქონე) ხელისუფლებასაც დაავიწყდა „9 წლის განმავლობაში მიტოვებული ხალხი, ვისთვისაც პატივი უნდა ეცათ“ თუ ბიუჯეტის სიმწირემ უბიძგათ ასე მოქცეულიყვნენ, ძნელი სათქმელია. ფაქტი ერთია: გოჩა პარუნაშვილი პოლიტიკიდან წავიდა, თუმცა, კვლავ ხელისუფლებაშია ის გუნდი, რომელსაც მაშინ პარუნაშვილი ემსახურებოდა, იმ არჩევნებიდან ორი წელი და ხელისუფლების შეცვლლიდან სამი წელიც გავიდა, მაგრამ „მეორე შახტელებისთვის“ არაფერი შეცვლილა.

მეტიც, ხელისუფლებას რომ ისევ გახსენებოდათ, ბოლო ერთ წელიწადში ადგილობრივებმა ორჯერ მიმართეს უკიდურეს ზომას, გზა გადაკეტეს. პირველად 5 ივნისს, მეორედ კი დღეს, 28 ივლისს.

5 ივნისს მათთან გამგებელი მივიდა და მოსახლეობას დაჰპირდა, რომ ამ დასახლებაში ბეტონის გზა დაიგებოდა. და ვიდრე გზას დააგებდნენ, ყოველდღე ივლიდა მანქანა მოსარწყავად. მანქანა მოსარწყავად მართლაც გაუშვეს, თუმცა, გზის დაგება არავის დაუწყია.

დღეს ადგილობრივებთან გამგეობიდან ისევ მივიდნენ. ამჯერად გამგებლის შვებულებაში ყოფნის გამო, მისი მოადგილე გურამ მელიქიძე და არქმშენინსპექციისა და მშენებლობაზე ზედამხედველობის განყოფილების უფროსი მიშა ვარდიძე.

დაპირების ტექსტი არ შეცვლილა, გამგეობა ადგილობრივებს ჰპირდება, რომ გზას აუცილებლად დააგებენ. თუმცა, რადგან ბიუჯეტს საშუალება არ აქვს, ელოდებიან იმ კომპანიების დასტურს სამუშაოს ერთობლივად დაგეგმაზე, რომლებსაც აღნიშნულ ტერიტორიაზე საამქროები აქვთ.
„სამუშაო პროცესი დავიწყეთ, შევხვდით კომპანიის წარმომადგენლებს, ავუხსენით რა გვინდა რომ აქ გაკეთდეს. ველოდებით პასუხს, როგორ შემოვლენ ამ გზის მშენებლობაში. დიდხანს არ უნდა გასტანოს ამ საკითხმა, უბრალოდ ველოდებით პასუხს“, – განაცხადა გამგებლის მოადგილემ გურამ მელიქიძემ.

შესრულდება თუ არა ადგილობრივი ხელისუფლების დაპირება ამჯერად, ამას მოგვიანებით გავიგებთ. მეორე შახტაში მცხოვრებ 120 ოჯახს იმედი აქვს, რომ გზის გადაკეტვა მესამედ აღარ მოუწევთ.



[თამარ თოთაძე, ახალციხე]