‘ბავშვებს ვერ ვუშვებთ ეზოში’ – ვალეში ადგილობრივებმა გზა გადაკეტეს

მეორე შახტაში მცხოვრებლებმა სამანქანო გზა დაახლოებით ერთი საათის წინ გადაკეტეს. ამ დროისთვის გზაზე 10–ზე მეტი სატვირთო მაქანაა გაჩერებული. ადგილზე უსაფრთხოებას საპატრულო პოლიცია აკონტროლებს.

მეორე შახტაში ამორტიზებული, ხრეშიანი გზაა. ადგილობრივები ამბობენ, რომ მძიმეწონიანი მანქანის ყოველ გავლაზე, დასახლებაში მტვრის ბუღია, საფრთხის გამო ეზოში ვერ უშვებენ ბავშვებს, ვერც ფანჯრებს აღებენ. გარდა ამისა, სატვირთო მანქანების ხშირი მოძრაობის გამო, სახლებს, რომლებიც მოძველებული და ისედაც ავარიულია, ბზარები დღითიდღე ემატება.

მეორე შახტის მცხოვრებლები ადგილობრივი ხელისუფლების ყურადღებას და გზის მოასფალტებას ითხოვენ.

შეკრებილებთან იმყოფება გამგებლის წარმომადგენელი ვალის ტერიტორიულ ორგანოში ელიოზ ბარბლიშვილი. მისი თქმით, ამ გზის შეკეთებაზე უკვე დაწყებულია მოლაპარაკებები.

„უბრალოდ, ყველაფერი დროსთან არის დაკავშირებული“, – ამბობს ელიოზ ბარბლიშვილი და ამატებს, რომ მას მოსახლეობის პროტესტის ესმის.

მეორე შახტის მცხოვრებლები ადგილობრივი ხელისუფლების წარმომადგენლების მისვლასა და კონკრეტულ დაპირებებს ითხოვენ.
„მოვიდნენ და გვითხრან როდის რას გეგმავენ. ამდენი წელია ტყუილი დაპირებებით და ლოდინით დავიღალეთ“, – ამბობს გზაზე შეკრებილი მოსახლეობა.

მეორე შახტაში იმყოფება „სამხრეთის კარიბჭეს“ ჟურნალისტი თამარ თოთაძე. მისი ინფორმაციით, რამდენიმე წუთის წინ შეკრებილებთან მივიდნენ ახალციხის მუნიციპალიტეტის გამგებლის მოადგილე გურამ მელიქიძე და მიშა ვარდიძე.

აღსანიშნავია, რომ ეს პროტესტის პირველი შემთხვევა არ არის. ადგილობრივებმა გზა ორი თვის წინაც გადაკეტეს. ადგილობრივი ხელისუფლების წარმომადგენლები შეკრებილებთან მაშინაც მივიდნენ და პრობლემების მოგვარებას დაჰპირდნენ. მაშინ "სამხრეთის კარიბჭესთან" ახალციხის მუნიციპალიტეტის გამგებელმა განაცხადა, რომ გზის შეკეთებას იმ იურიდიულ პირებთან ერთად ეცდება, რომლებიც ამ დასახლებასთან ახლოს მუშაობენ. გარდა ამისა, მაშინ გამგებელი ადგილობრივებს დაჰპირდა, რომ ვიდრე გზა შეკეთდებოდა, ყოველდღე ივლიდა მანქანა, რომელიც გზას მორწყავდა.

ადგილზე რჩება "სამხრეთის კარიბჭე". თვალი ადევნეთ ვებგვერდს, მოვლენათა განვითარების შესახებ ჩვენი ჟურნალისტები გიამბობენ.

[თამარ თოთაძე, ნინო ნარიმანიშვილი, ახალციხე]