‘იმედი გვაქვს, მესამედაც არ მოგვიწევს გზის გადაკეტვა’ – ‘მეორე შახტელები’ ახალი დაპირებებით გააჩუმეს

ამორტიზებული გზა, მტვერი, სატვირთო მანქანების ხშირი მოძრაობა, სასმელი და სარწყავი წყლის უქონლობა, საცხოვრებელი სახლების დაზიანებული სახურავები, გასაწმენდი სანიაღვრე არხი – ეს მეორე შახტის მცხოვრებთა პრობლემების არასრული ჩამონათვალია.

ადგილობრივები პრობლემებზე ახლა არ ალაპარაკებულან. წლებია ისინი დახმარებას ითხოვენ. ამბობენ, რომ ყოველი წვიმის შემდეგ, მათ სახლებში სახურავებიდან წყალი ჩადის. დასახლებაში ორი მსხვილი საამქრო მუშაობს, საიდანაც კომპანიები ხრეშსა და ასფალტს ეზიდებიან და დასახლებულ პუნქტში ყოველდღიურად ათობით სატვირთო დადის. ყველა სატვირთოს გავლის შემდეგ კი მტვერი ნისლივით დგება.

„ისეთი მტვერია, ხალხი აღარ ჩანს, ფანჯრები ვერ გაგვიღია, სახლში შემოდის მტვერი. ამ ჰაერს ვსუნთქავთ ყველა“, – ამბობს სუსანა მურადიანი.

„არც წყალი გვაქვს, საღამოობით მოდის და ისიც არ გვყოფნის. სანიაღვრე არხი გასაწმენდია, ძლიერი წვიმა რომ მოვიდეს, ნიაღვარი სახლში შემოვა“, – ამატებს გულო კობაიძე.

მეორე შახტაში მცხოვრებლები დახმარებას ხელისუფლებისგან ელიან. ყურადღების მიქცევის მიზნით, დღეს, 28 ივლისს, მათ დაახლოებით ერთი საათის განმავლობაში გზა გადაკეტეს. დასახლებაში 10–ზე მეტი სატვირთო მანქანა იყო გაჩერებული. ადგილზე იმყოფებოდნენ გამგებლის წარმომადგენელი ვალის ტერიტორიულ ორგანოში და დეპუტატი.

„როგორც ვიცი, მიმდინარეობს მოლაპარაკება იმ კომპანიებთან, ვინც უშუალოდ ამ დასახლებაში მუშაობს. უკვე პროექტის დონეზეა და უნდა გაკეთდეს ბეტონის გზა. ამას გარკვეული პროცედურები და დრო სჭირდება, მაგრამ ეს საკითხი აუცილებლად მოგვარდება“, – ამბობს გამგებლის წარმომადგენელი ვალის ტერიტორიულ ორგანოში ელიოზ ბარბლიშვილი.

ადგილობრივები იქამდე არ დაიშალნენ, ვიდრე მათთან ახალციხის მუნიციპალიტეტის გამგეობის წარმომადგენლები არ მივიდნენ.

„ორი თვის წინაც გადავკეტეთ იგივე მიზეზით გზა, მოვიდნენ, დაგვპირდნენ, რომ გზას დააგებდნენ, მაგრამ აქამდე არაფერი გაკეთებულა. ახლა ველოდებით, რომ ვინმე მოვიდეს გამგეობიდან და გვითხრას რას აპირებენ“, – ამბობენ ადგილობრივები.

ახალციხის მუნიციპალიტეტის გამგებელი ზაზა მელიქიძე შვებულებაშია, ამიტომ, ადგილობრივებთან შესახვედრად მისი მოადგილე გურამ მელიქიძე და არქმშენინსპექციისა და მშენებლობაზე ზედამხედველობის განყოფილების უფროსი მიშა ვარდიძე მივიდნენ.

გამგეობის წარმომადგენლები მოსახლეობას დაჰპირდნენ, რომ დასახლებაში გზა აუცილებლად გაკეთდება.

„სამუშაო პროცესი დავიწყეთ, შევხვდით კომპანიის წარმომადგენლებს, ავუხსენით რა გვინდა რომ აქ გაკეთდეს. ველოდებით პასუხს, როგორ შემოვლენ ამ გზის მშენებლობაში. დიდხანს არ უნდა გასტანოს ამ საკითხმა, უბრალოდ ველოდებით პასუხს“, – ამბობს გურამ მელიქიძე.

მისივე თქმით, ამ ეტაპზე მუნიციპალიტეტს რომ ჰქონდეს საშუალება, რომ ამ დასახლებაში გზა გააკეთოს, აუცილებლად გააკეთებდა და სხვა კომპანიებს დახმარებისთვის არ დაელოდებოდა.

„ჩვენი სახსრები რომ არ გვყოფნის, ამიტომ ვცდილობთ, ვინც იყენებს ამ გზას და მოსახლეობას აწუხებს, ისინი წილში შემოვიდნენ, – ამბობს მელიქიძე.

გამგებლის მოადგილე ირწმუნება, რომ დასახლებაში ეტაპობრივად ყველა პრობლემა მოგვარდება: „რიგითობის მიხედვით, შესაძლებლობის ფარგლებში დავიწყებთ ამ პრობლემების მოგვარებას, რომ მოსახლეობამ იგრძნოს ჩვენი მხარდაჭერა“.



[თამარ თოთაძე, ახალციხე]