"დემოკრატიული მოძრაობისა" და "ოცნების" შტაბების ურთიერთბრალდებები

„სად იყვნენ მალხაზ ჟუჟუნაძე და გოჩა პარუნაშვილი მაშინ, როცა „ქართული ოცნება“ ადამიანებმა თავისი ზურგით მოიტანეს?! მაშინ პარუნაშვილს 5-იანი ჰქონდა გადმოკიდებული“, - ამბობს „ბურჯანაძე - დემოკრატიული მოძრაობის“ ახალციხის შტაბის უფროსი გაგა ივანიძე, რომელიც გასული წლის საპარლამენტო არჩევნების დროს ახალციხის მუნიციპალიტეტის გამგეობის საფინანსო-საბიუჯეტო სამსახურის უფროსი იყო.

„ბურჯანაძე - დემოკრატიული მოძრაობის“ რეგიონის შტაბების კოორდინატორი ჯიმშერ გოგოლაური აცხადებს, რომ „ქართული ოცნების“ შტაბში ბევრი ჩანერგილი და გამყიდველია, ასეთ ადამიანებს კი „ბურჯანაძის“ შტაბში არავინ მიიღებს: "ოცნების“ შტაბში საპარლამენტო არჩევნებამდე რეგიონის ოპერატიული სამსახურის უფროსი ვიყავი და ძალიან კარგად ვიცი ვინ ვინაა. ბიძინა ივანიშვილის აქცია რომ იყო, პარუნაშვილის სასტუმროში ოთხი ნომერი დავჯავშნეთ, მაგრამ ბოლო წუთს უარი გვითხრა სტუმრების დაბინავებაზე, კანალიზაცია გაფუჭდაო, მოიმიზეზა. არადა გადავამოწმეთ, ახლობელს ვაკითხინეთ და მას უთხრეს, რომ სასტუმროში ნომრის გაქირავების არანაირი პრობლემა არ იყო. არც ჟუჟნაძე და არც პარუნაშვილი არჩევნებამდე არცერთ აქციაზე არასდროს ყოფილან“.

ამ ბრალდებას "ქართული ოცნების" ახალციხის შტაბის აქტივის კოორდინატორი გოჩა პარუნაშვილი ასე პასუხობს: "ასეთ ფაქტს ნამდვილად ჰქონდა ადგილი, მე მაშინ "ქართული ოცნების" ასპინძის რაიონულ ოფისში ვმუშაობდი და მქონდა ზუსტი ინფორმაცია იმის შესახებ, რომ ჯიმშერ გოგოლაური ვახტანგ გეწაძესთან თანამშრომლობდა (ს.კ. იმ პერიოდში ვახტანგ გეწაძე შსს სამცხე-ჯავახეთის სამხარეო მთავარი სამმართველოს უფროსის მოადგილე იყო). გოგოლაური "ოცნების" წევრი არ იყო და ის ოთხი ნომერი ამიტომ დავბლოკე".


გოგოლაური ადასტურებს, რომ "ოცნებიდან" ბურჯანაძის პარტიაში აქტივისტები მართლაც გადადიან: „რეგიონის მასშტაბით ასეთი 100 ადამიანი მაინც იქნება და აქედან უმრავლესობა სწორედ ახალციხის შტაბის წევრია“.

შეგახსენებთ, რეჟისორმა ზაზა სვანაძემ დღეს განაცხადა, რომ "ოცნების" კოორდინატორების მხრიდან აქტივისტებზე ზეწოლის გამო, ბევრი "ქართული ოცნებიდან" ბურჯანაძის პარტიაში გადადის. ამ ბრალდებას "ოცნების" შტაბში ასე პასუხობენ: "არ უნდათ ჩვენთან დგომა, განსხვავებული აზრი აქვთ?! ღმერთმა ხელი მოუმართოთ! მაგრამ ჭუჭყისა და ლაფის სროლას თავი დაანებონ, ბევრ რაღაცას წერენ და პირი არ გამაღებინონ, იქ მყოფმა წევრებმა“.

[sknews.ge]