'ოცნება' მეორე შახტის მოსახლეობას დახმარებას დაჰპირდა(R)

ვალის მეორე შახტის დასახლებაში დაახლოებით 120 ოჯახი ცხოვრებს. ადგილობრივების ძირითადი პრობლემა დანგრევის პირას მისული საცხოვრებელი კორპუსებია. დასახლებაში არც გამრიცხველიანებაა.

„სახურავები ძალიან დაზიანებულია, წვიმა სახლებში ჩამოდის. მარტო მეორე სართულზე კი არა, წვიმის წყალი პირველ სართულზეც აღწევს. ყველგან ჯამები გვაქვს შედგმული და ძლიერი წვიმის დროს წყალს ისიც არ იკავებს“, - ამბობს მეორე შახტაში მცხოვრები თინა გელაშვილი.

ადგილობრივების თქმით, წვიმის წყალი მხოლოდ სახურავიდან არ ჩადის. შენობებს კედლები იმდენად აქვს დაზიანებული, რომ ეზოში მოვარდნილი წყალი პირველი სართულის კედლებშიც ჟონავს.

„ყველა სახლში ნესტის სუნი დგას, აქ გაჩერება შეუძლებელია. წყალიც გრაფიკით მოდის, ახლა არჩევნები ახლოვდება და შედარებით კარგად მოდის. ისე ორ დღეში ერთხელ მოდის“, - ამბობს ადგილობრივი სოფია ფილთაგიანი.

„ქართული ოცნების“ ახალციხის შტაბის წარმომადგენლები მეორე შახტის მოსახლეობას ამ პრობლემების მოგვარებას დაჰპირდნენ და აღნიშნეს, რომ ეს მხოლოდ წინსაარჩევნო დაპირება არ იქნება.

„ამ დასახლებაში ისეთი პრობლემებია, რომელიც შეიძლება მოგვარდეს, თუ ცენტრალური მთავრობა და ადგილობრივი ხელისუფლება ყურადღებას მიაქცევს. მე არაერთხელ ვახსენე და კიდევ ერთხელ მინდა მადლობა ვუთხრა ადგილობრივ ხელისუფლებას, რომ ამ ტერიტორიაზე ბევრი პროექტია დაგეგმილი“, - განმარტავს „ქართული ოცნების“ ახალციხის შტაბის აქტივის კოორდინატორი გოჩა პარუნაშვილი და ამატებს, რომ გასული ცხრა წლის განმავლობაში გზის თუნდაც თითო მეტრი რომ გაკეთებულიყო, ამ დასახელბაში სხვა მდგომარეობა იქნებოდა.

გოჩა პარუნაშვილმა ადგილობრივებთან გამრიცხველიანების შესახებაც ისაუბრა და აღნიშნა, რომ იგი პირადად იყო ჩართული მოლაპარაკებებში და მეორე შახტის გამრიცხველიანება მიდნარე წლის დეკემბრიდან უნდა დაიწყოს.

„სირცხვილია უბრალოდ, რომ ამ ცხრა წლის განმავლობაში ეს ადამიანები იყვნენ მიტოვებული. ამ დასახლებაში 300 ამომრჩეველია და როგორც ჩანს, მთავრობას ეს ხმები არ ანაღვლებდა. ჩვენთვის მხოლოდ ამომრჩევლები არ არიან, ჩვენი მოქალაქეები არიან და პატივი უნდა ვცეთ“, - აღნიშნა გოჩა პარუნაშვილმა.

ადგილობრივები ამბობენ, რომ მთავრობას ისინი მხოლოდ წინსაარჩევნოდ ახსენდება. მათი თქმით, ვერც ის გაიგეს, მეორე შახტა ქალაქს ეკუთვნის თუ სოფელს.

„ეს დასახლება ტერიტორიულად ქალაქ ვალეს ეკუთვნის, უბრალოდ წლების განმავლობაში იყო უყურადღებოდ მიტოვებული და ბევრი პრობლემა დაგროვდა. ახლა ვსწავლობთ ამ პრობლემებს და ეტაპობრივად ვიწყებთ მათ მოგვარებას“, - ამბობს ვალის ტერიტორიული ორგანოს რწმუნებული ელიოზ ბარბლიშვილი.

[sknews.ge]