რას გააკეთებს გამგეობა „მეორე შახტაში“ მომავლი წლის ბიუჯეტით

ახალციხის მუნიციპალიტეტის გამგებლის ზაზა მელიქიძის განცხადებით, 2016 წელს ადგილობრივი ბიუჯეტიდან გამოყოფილი თანხით ე.წ. მეორე შახტაში ყველა ავარიული კორპუსის სახურავი შეკეთდება.

„მეორე შახტა ჩვენი მუნიცპალიტეტისათვის მტკივნრეული თემაა, იქ არსებული სოციალურ ეკონომიკური მდგომარეობა და ინფრასტრუქტურა სავალალო მდგომარეობაშია“, – განაცხადა ახალციხის მუნიციპალიტეტის გამგებელმა ზაზა მელიქიძემ ახალციხის თემის მომავალი წლის ბიუჯეტის საჯარო განხილვისას.

მისი თქმით, მიმდინარე წელს „მეორე შახტაში“ ორი კურპუსის სახურავი უკვე შეკეთდა, ორი შეკეთება კი ამ დორისთვის ჯერ ისევ მიმდინარეობს: „2016 წელს პირველ რიგში სახურავებს რეაბილიტაციას ჩავუტარებთ“.

როგორც ახალციხის მუნიციპალიტეტის გამგეობის თანამშრომლები აცხადებენ, სოფლის მხარდაჭერის პროგრამის ფარგლებში „მეორე შახტისთვის“ მხოლოდ 10 000 ლარია გათვალისწინებული. ეს თანხა კი ერთი სახურავის შეკეთებასაც არ ეყოფა.

„თითო სახურავის შესაკეთებლად საშუალოდ 20–25 ათასი ლარი გვიჭრდება. აქ სულ 24 კორპუსია. როგორც უკვე აღვნიშნე ოთხს ვაკეთებთ, დანარჩენის რეაბილიტაციას კი დაახლოებით 300 000 ლარი სჭირდება. ამ თანხის მობილიზებას ჩვენი ბიუჯეტით შევძლებთ“, – ამბობს მელიქიძე.

რაც შეეხება გზის პრობლემას, აქ გამგებელს ინვესტორის დახმარების იმედი აქვს: „წყლის საკითხთან დაკავშირებით კი წყალმომარაგების კომპანიასთან აქტიურად ვთანამშრომლობთ. რამდენიმე დღეში დაიწყება წყლის მილის შეცვლა, ახალი მილს უფრო დიდი დიამეტრი ექნება და მოსახლეობა მეტ წყალს მიიღებს“.

შეგახსენებთ, რომ ვალეში, ე.წ. მეორე შახტის დასახლებაში ადგილბრივებმა მწყობრიდან გამოსული წყლის, ასევე ავარიული კორპუსების შეკეთებისა და უწყლობის გამო საპროტესტო აქცია არაერთხელ გამართეს.

[თამუნა უჩიძე, ახალციხე]