"სამივეს გული ქონდა გახეთქილი" - უბედური შემთხვევა ჭაჭარაქში [Video]
მთავარი → ვიდეო, შემთხვევა23.07.2015რა გახდა ახალგაზრდების გარდაცვალების მიზეზი და რას ყვებიან გადარჩენილები. უბედური შემთხვევა სოფელ ჭაჭარაქში;
უბედური შემთხვევა სოფელ ჭაჭარაქთან, მდინარე მტკვარზე 23 ივლისს, დაახლოებით 15:30 საათზე მოხდა. მდინარეზე საბანაოდ სოფლიდან ექვსი ახალგაზრდა წავიდა, მათ შორის, ერთმა თან ორი წლის ბავშვი წაიყვანა. ახალგაზრდებმა პატარა მდინარის ნაპირზე დატოვეს და საბანაოდ შევიდნენ.
„შუადღეს წავედით, თავიდან ისინი (სამ გარდაცვლილს გულისხმობს „ს.კ“) ნაპირთან იყვნენ, რადგან ცურვა არ იცოდნენ. მერე შევიდნენ ღრმა წყალში უკან უნდოდათ გამოსვლა, მაგრამ ვეღარ გამოვიდნენ. სამივე ადგილზე ჩაიტანა წყალმა და ჩაძირა. ამ ადგილზე პირველად ვიყავით. არ ვიცოდით წყალი ღრმა რომ იყო, უცებ ჩავარდნენ. რომ შევბრუნდი, უკვე იძირებოდნენ, მარტო ხელები ჩანდა“, – ამბობს შემთხვევის შედეგად გადარჩენილი ხვიჩა ნაზარეტიანი.
ღრმა წყლიდან გამოსვლა შეძლო მისმა მეგობარმაც.
„ორი იხრჩობოდა და ორივე ხელებზე ჩამომეკიდა, უცებ ჩავარდნენ, ერთის გამოყვანა შევძელი, მეორეზე რომ შევტრიალდი აღარ ჩანდა. ცურვა მარტო მე ვიცოდი, დანარჩენებმა არა“, – გვიყვება არჩილ ინასარიძე.
ინასარიძემ დასახმარებლად მამას დაურეკა: „დაახლოებით ოთხი საათი იყო რომ ჩავედი. სამივე ნაპირთან იდგა, იქვე იყო 2 წლის ბავშვიც. გოგონა, რომლიც ბიჭებმა გადაარჩინეს შოკში იყო და ვეღარ ლაპარაკობდა. მაშინვე დავრეკე 112–ში, დაახლოებით ნახევარ საათში მოვიდა პოლიცია, მერე სასწრაფო და მაშველები. მათი გადარჩენის არანაირი შანსი აღარ იყო“, – ამბობს ვეფხვია ინასარიძე.
მისი თქმით, გარდაცვლილებს შიშით გული ჰქონდათ გახეთქილი: „მაშველებმა კაუჭების საშუალებით ამოიყვანეს წყლიდან, ჯერ გოგონები, შემდეგ ბიჭი. საბანაოდ რომ მიდიოდნენ, ვუთხარი ისეთ ადგილზე ებანავათ, სადაც წყლის დონე დაბალი იყო, მანდ საიდან აღმოჩნდნენ, არ ვიცი. იმ გოგონებიდან, რომლებიც გარდაიცვალნენ, ერთ–ერთმა მთხოვა, რომ ჩემი შვილიც გამეყოლებინა და უარი ვეღარ ვუთხარი, გამეხუმრა: იცოდე წავიყვან და უკან აღარ ამოვიყვანო და სამწუხაროდ თვითონ ვეღარ ამოვიდა“.
სამი გარდაცვლილიდან ორი და–ძმაა. გარდაცვლილ 19 წლის გოგონას, მეუღლე და 1 მცირეწლოვანი შვილი დარჩა. ერთ–ერთი 22 წლის გოგონა კი ახალქალაქის მუნიციპალიტეტიდანაა და ჭაჭარაქში დროებით ნათესავთან ცხოვრობდა.
ადგილობრივები ამბობენ, რომ გარდაცვლილების ძებნა დაახლოებით სამი საათის განმავლობაში მიმდინარეობდა. მათი პოვნის შემდეგ ადგილზე მივიდა სასწრაფო სამედიცინო დახმარების ბრიგადა, მოგვიანებით კი სამივე ახალციხის პროზექტურაში გადაიყვანეს. გარდაცვლილებს ექსპერტიზა ამ დრომდე უტარდებათ.
გადარჩენილი ახალგაზრდები პოლიციამ ადგილზე დაკითხა, სამიდან ყველაზე უფროსი კი დასაკითხად ახალციხის რაიონულ სამმართველოში გადაიყვანეს.
„მომხდარის გამო შოკშია, სხვა არაფერი ვიცი. ახლა პოლიციაში იმყოფება“, – ამბობს გოგონას ძმა ალექსანდრე ბერიძე.
უბედური შემთხვევის შემდეგ გავრცელდა ინფორმაცია, რომ ახალგაზრდების გარდაცვალების მიზეზი მტკვარის დონის მომატება გახდა, თუმცა აღნიშნული ფაქტი ადგილობრივებმა კატეგორიულად უარყვეს.
უბედური შემთხვევის ადგილზე იმყოფებოდა ახალციხის მუნიციპალიტეტის გამგებელი ზაზა მელიქიძეც. მელიქიძე გარდაცვლილების ოჯახებს დახმარებას დაჰპირდა.
მომხდარზე ძიება ახალციხის რაიონულმა სამმართველომ სსკ–ის 115–ე მუხლით დაიწყო, რაც თვითმკვლელობამდე მიყვანას გულისხმობს.