თვითმხილველი დამხრჩვალ მოზარდზე: მოულოდნელად მოვარდა წყალი, ვეღარ ვუშველეთ

"ოთხნი ვიყავით, სათევზაოდ წავედით, ნკეები გვქონდა. ძალიან რომ დაცხა, მუხლებამდე წყალში შევედით, ვკითხეთ ცურვა თუ იციო და კიო. უცებ წყალი მოვარდა, ლ.ი. ტალღებზე გადახტა და ჩაიძირა. შევყევი საშველად, მაგრამ ვერ ვუშველე. ნაპირზე გამოვცურე და ვყვიროდი მოგვეშველეთ–მეთქი. სოფლის მაღაზიასთან გავიქეცი, ხალხი იყო, მაგრამ ვერავინ ვეღარ უშველა", – გვიამბობს გარდაცვლილის მეგობარი.

მისივე თქმით, ოთხიდან წყალში მხოლოდ ორნი, თვითონ და ლ.ი. შევიდნენ: "სხვები არ შემოვიდნენ, ცურვა არ იციან. ლ.ი. წელს ორჯერ გადაარჩინეს დახრჩობას, როგორც ჩანს, არ იცოდა ცურვა".

შეგახსენებთ, ასპინძაში, სოფელ ნიჯგორში, დღეს, 7 აგვისტოს, მდინარრე მტკვარში 12 წლის ბიჭი დაიხრჩო. ბავშვი წარმოშობით ნიჯგორიდანაა, თუმცა თბილისში ცხოვრობდა. იგი სოფელში, ბებიასთან დასასვენებლად იყო ჩამოსული.

შემთხვევის ადგილზე ამ დრომდე რჩებიან ადგილობრივები, სამართალდამცველები და მაშველები. ჯერ ისევ ელოდებიან მყვინთავების ჯგუფს თბილისიდან. მაშველები ამბობენ, რომ იმ ადგილას სადაც შემთხვევა მოხდა, წყალი ღრმაა და სპეციალური მოწყობილობის გარეშე ვერ ჩავლენ.

ამ დროისთვის მაშველები ნავებით მდინარეში შევიდნენ, მდინარის ნაპირზე ცხედარს ეძებენ ადგილობრივებიც.

სამაშველო სამსახურში ამბობენ, რომ შეტყობინებიდან მალებე ადგილზე მაშველების ორი ჯგუფი მივიდა, თბილისიდან წასულია მყვინტავების ჯგუფიც და ისინი მთელი ღამის განმავლობაში იმუშავებენ.





[ნინო ნარიმანიშვილი, თამუნა უჩიძე, ასპინძა]