უბედური შემთხვევა ტბაზე

საგანგებო სიტუაციათა მართვის სამსახურის სამი მყვინთავი სამსონიძეს დაახლოებით ორი საათის განმავლობაში ეძებდა. შემთხვევა ღამის 3:00 საათისთვის მოხდა.

ტბაზე არსებული ბარი ამ დროისთვის უკვე დაკეტილი იყო. ბარ-მენეჯერი გარიკ გასანოვი ამბობს, რომ უბედური შემთხვევის შესახებ დილით შეიტყო.

-”ტბაში სამი ახალგაზრდა წყლის ველოსიპედით ცურავდა, ველოსიპედში წყალი შევიდა და ჩაძირვა დაიწყო, ორმა გამოცურა, ბესიკ სამსონიძემ კი ცურვა არ იცოდა და გამოსვლა ვერ შეძლო”, - გვიყვება გასანოვი.

მისი თქმით, ნავის ჩაძირვა შესაძლოა სიმძიმემაც გამოიწვია, რადგან ველოსიპედი ორადგილიანია და სამნი ისხდნენ.

-”ტბაზე რომ გავედი შემთხვევის ადგილზე უკვე მობილიზებული იყო პოლიცია, სასწრაფო სამედიცინო, ასევე საგანგებო სიტუაციების მართვის სამსახური და გვამიც უკვე ამოყვანილი ჰყავდათ”, - გვიამბობს ტბასთან არსებული სასტუმრო ”რიოს” დარაჯი ზვიად ტაბატაძე.

გვამი წყლიდან საგანგებო სიტუაციების მართვის სამსახურმა ამოიყვანა.

-”გარდაცვლილი ფანტანთან ახლოს, ხუთი მეტრის რადიუსში ვნახეთ”, - ამბობს საგანგებო სიტუაციების მართვის სამსახურის უფროსის მოადგილე ვეფხია ტატალაშვილი.

გარდაცვლილი ახალციხის სასწრაფო სამედიცინო დახმარების სამსახურმა ახალციხის რაიონული საავადმყოფოს პროზექტურაში გადაიყვანა.

[თინათინ ზაზაძე, ახალციხე]