სამ დღეში სამი „პირადი განცხადებით“ გადამდგარი ჩინოვნიკი ახალციხეში

სამივე თანამდებობიდან წასული პირი ირწმუნება, რომ გადადგომის შესახებ განცხადება თავად დაწერეს. თუმცა, განსხვავებით გუბერნატორის მოადგილისა და „კეთილმოწყობის“ უფროსისგან, საქართველოს გაერთიანებული წყალმომარაგების კომპანიის სამცხე–ჯავახეთის რეგიონული ფილიალის მენეჯერი გიორგი ბაგინაშვილი დღეს სამსახურში ჩვეულებრივად გამოცხადდა და ამ წუთებშიც სამუშაო კაბინეტშია.

ბაგინაშვილის თანამდებობიდან წასვლის შესახებ ინფორმაცია ადგილობრივმა ტელეკომპანიამ გაავრცელა. მასალაში კომპანიის მედიასთან და საზოგადოებასთან ურთიერთობის სამსახურის უფროსის ნინო რამიშვილი აცხადებს, რომ გიორგი ბაგინაშვილმა პოსტი პირადი განცხადების საფუძველზე 15 ივლისს დატოვა. თუმცა, ამავე ინფორმაციაში, ბაგინაშვილმა „თავისი ნებით მიღებული გადაწყვეტილების“ შესახებ“ ჯერ არაფერი იცის.

„სამხრეთის კარიბჭემ“ ბაგინაშვილს კაბინეტში მიაკითხა.

„რა პრობლემაა, მივდივარ, სხვა სამსახურში გადავდივარ“, – ხელების ფშვნეტით განაცხადა „სამხრეთის კარიბჭესთან“ გიორგი ბაგინაშვიმა. კითხვაზე, რატომ არ დაადასტურა ეს ფაქტი ტელევიზიასთან, გვითხრა: „მაშინ ჯერ ბრძანება არ იყო დაწერილი“. კითხვებზე, რა ბრძანებას გულისხმობს, ნამდვილად მისი გადაწყვეტილება იყო თუ არა თანამდებობიდან წასვლა და როდის დაწერა განცხადება, ბაგინაშვილმა აღარ გვიპასუხა.

„რა პრობლემაა, მე წავალ და სხვა შემცვლის. მართლა ჩემი გადაწყვეტილებით მივდივარ“, – გაგვიმეორა კიდევ ერთხელ.

„სამხრეთის კარიბჭე“ ესაუბრა საქართველოს გაერთიანებული წყალმომარაგების კომპანიის მედიასთან და საზოგადოებასთან ურთიერთობის სამსახურის უფროსს, ნინო რამიშვილს, რომელმაც განაცხადა, რომ ბაგინაშვილმა გათავისუფლების შესახებ განცხადება დღეს, 15 ივლისს დაწერა: „მიზეზი რა არის ნამდვილად არ ვიცი, მე გელაპარაკებით დოკუმენტებით“.

გიორგი ბაგინაშვილი აღნიშნულ პოზიციაზე 2010 წლის თებერვლიდან მუშაობდა.

შეგახსენებთ, 13 ივლისს, თანამდებობა დატოვა სამცხე–ჯავახეთის გუბერნატორის მოადგილემ, ავთანდილ კაჭკაჭაშვილმა, 14 ივლისს, შპს „კეთილმოწყობის“ უფროსმა გიორგი ბალიაშვილმა, 15 ივლისს კი საქართველოს გაერთიანებული წყალმომარაგების კომპანიის სამცხე–ჯავახეთის რეგიონული ფილიალის მენეჯერმა გიორგი ბაგინაშვილმა.

[ნინო ნარიმანიშვილი, თამუნა უჩიძე, ახალციხე]