გუბერნიაში თანამდებობა კიდევ ერთმა თანამშრომელმა დატოვა

რეგიონული პროექტების კოორდინირების სამსახურის უფროსის მოადგილემ ელდარ ჭაღიაშვილმა სამსახურიდან წასვლის შესახებ განცხადება 13 ივლისს დაწერა.

ჭაღიაშვილს განცხადებაში გათავისუფლების მიზეზი არ დაუსახელებია:“ უბრალოდ ითხოვს თანამდებობიდან გათავისუფლებას“, – განმარტავს სახელმწიფო რწმუნებულის– გუბერნატორის აპარატის უფროსი გიორგი მიქელაძე.

ელდარ ჭაღიაშვილი „სამხრეთის კარიბჭესთან“ აცხადებს, რომ სამსახურიდან წასვლის გადაწყვეტილება თავად მიიღო: „ ძალიან დატვირთული ვიყავი, აღარ ვარ ახალგარზდა. ჯერ არ ვიცი სად წავალ, შესაძლოა თბილისში წავიდე. 60 წელს მიღწეული კაცი ვარ და ჩემზე ზეწოლას ვერ განახორციელებდნენ“.

ელდარ ჭაღიაშვილი სამცხე–ჯავახეთის სამხარეო ადმინისტრაციაში 2014 წლის მაისიდან მუშაობდა. ამ ეტაპზე რეგიონული პროექტების კოორდინირების სამსახურის უფროსის მოადგილის პოსტი ვაკანტურია. აღნიშულ პოსტზე კანდიდატი კონკურსის წესით უნდა შეირჩეს.

შეგახსენებთ, რომ ელდარ ჭაღიაშვილის მსგავსად 13 ივლისს დატოვა თანამდებობა გუბერნატორის მოადგილე ავთანდილ კაჭკაჭაშვილმა. ერთი დღის შემდეგ, 14 ივლისს საკუთარი განცხადების საფუძველზე დატოვა პოსტი შპს „კეთილმოწყობის“ უფროსმა გიორგი ბალიაშვილმაც. 15 ივლისს გათავისუფლების შესახებ კი პირადი განცხადება დაწერა საქართველოს გაერთიანებული წყალმომარაგების კომპანიის სამცხე–ჯავახეთის რეგიონული ფილიალის მენეჯერმა გიორგი ბაგინაშვილმა.

[თინათინ ზაზაძე, ახალციხე]