‘ვერ შევთანხმდი ხელმძღვანელობასთან’ - ბესიკ ფილაურმა თანამდებობა დატოვა

ბესიკ ფილაურმა გადადგომასთან დაკავშირებით განცხადება 17 მარტს, ღამით დაწერა. ამბობს, რომ ეს გადაწყვეტილება თავად მიიღო.

„არ არის ისეთი მხარდაჭერა, როგორიც ხალხს დავპირდი და ვერ ვაკეთებ საქმეს. იყო პროექტების თემა, რომელიც მინდოდა გამეკეთებინა, რეგიონისთვის და ახალციხისთვის. ვერ შევთანხმდი ხელმძღვანელობასთან და ჩემით წავედი“, - განაცხადა მან „სამხრეთის კარიბჭესთან“, თუმცა რომელ პროექტებს გულისხმობდა არ დააკონკრეტა.

ყოფილი მენეჯერი მუშობას კერძო ბიზნესში გააგრძელებს - „კერძო ბიზნესი მაქვს მე და მივხედავ იმას ბაკურიანში“.

„გაერთიანებული წყალმომარაგების კომპანიის“ სამცხე–ჯავახეთის რეგიონული ფილიალის მენეჯერად, ბესიკ ფილაური 2017 წლის აგვისტოდან მუშაობს. მან ამ თანამდებობაზე ბორის სპანდერაშვილი ჩაანაცვლა. მანამდე კი ბაკურიანის სერვისცენტრის მენეჯერის პოზიცია ეკავა.

ცნობისთვის, აღნიშნული თანამდებობა ფილაურის წინამორბედმა, ბორის სპანდერაშვილმაც პირადი განცხადების საფუძველზე დატოვა.

[თაკო ფეიქრიშვილი, ახალციხე]