'მადლობა შინაგან სამინისტროს' – საქველმოქმედო კონცერტი ახალციხეში

საქველმოქმედო აქცია–კონცერტი ახალციხის ციხის ტერიტორიაზე 7:00 საათზე დაიწყო. მაყურებლის წინაშე ჯგუფი "ფრანი", მარკუს მეტრეველი, ნიკი სლოუ და სხვა მომღერლები წარსდგნენ.

Tbilisi City–ს დირექტორის, აქცია-კონცერტის ორგინაზატორის თქმით, კონცერტი ტურნეს სახით არის დაგეგმილი და ახალციხიდან დაიწყო.

„ახალციხელი ვარ, ამიტომ ჩავთვალე, რომ ტურნე ახალციხიდან დამეწყო“,- ამბობს კენი მანასიანი.

'მადლობა შინაგან სამინისტროს', 'მადლობა გიორგი კოპაძეს' – ისმოდა კონცერტის მიმდინარეობისას. როგორც "სამხრეთის კარიბჭემ" გაარკვია, შინაგან საქმეთა სამინისტრომ, რომელსაც რატომღაც შინაგან სამინისტროდ მოიხსენიებდნენ, მადლობა მის დაქვემდებარებაში მყოფ უწყებებში ყველაზე მეტი ბილეთის გაყიდვის გამო დაიმსახურა. ახალციხის მერმა გიორგი კოპაძემ, კი მერიისგან გაწეული მხარდაჭერისთვის. თუმცა, მერიის მხარდაჭერით კონცერტის ორგანიზატორი მთლად კმაყოფილიც არ ჩანდა.

"მერია რაღაც გარკვეული ნაწილით კი დაგვეხმარა, მაგრამ იმდენად არა, რამდენადაც მინდოდა. მაინც მადლობა, რომ ბილეთები შეიძინეს“, – უთხრა "სამხრეთის კარიბჭეს" კენი მანასიანმა.

მისივე თქმით, შემოსული თანხა მთლიანად, თბილისში სტიქიის დროს დაზარალებულ მოსახლეობას გადაერიცხება. მსგავსი აქცია-კონცერტი გორში, თელავსა და ქუთაისშია დაგეგმილი.

შეგახსენებთ, 13 ივნისს, საღამოს ძლიერმა წვიმამ მდინარე ვერეს ადიდება გამოიწვია, შედეგად დაიტბორა ვაკე-საბურთალოს გზა, თბილისის ზოოპარკი, გმირთა მოედანი. ზოოპარკიდან გაიქცნენ ცხოველები, წყნეთი-ბეთანიის გზაზე ჩამოწვა მეწყერი. სტიქიის შედეგად გარდაიცვალა 19 ადამიანი, ამ დრომდე დაკარგულად ითვლება 3 ადამიანი. სტიქიის შედეგად თბილისს ათობით მილიონი ლარის ზარალი მიადგა.

[ვარლამ წიკლაური, ახალციხე]