კონცერტი გლოვის დღეს

„დაგეგმილი 19:00 საათის ნაცვლად, კონცერტს გვიან დავიწყებთ და არ გვექნება ტაშ–ფანდურა“, – ამბობს ანსამბლ „მესხი ფრთოსანის“ ხელმძღვანელი, ქორეოგრაფი ბესარიონ კოვზიაშვილი.

მისივე თქმით, ეს არის შემაჯამებელი კონცერტი და ამ დღისთვის რამდენიმე თვე ემზადებოდნენ: „გაყიდულია ბილეთები, ნაქირავებია დარბაზი თეატრში, ველოდებით ბევრ სტუმარს“.

„სამხრეთის კარიბჭეს“ კითხვაზე, ესაუბრა თუ არა თეატრის ადმინისტრაციას კონცერტის თარიღის გადაწევაზე, ან ვინ არიან სტუმრები, ვის გამოც დაგეგმილი კონცერტი ვერ გადაიდება, კოვზიაშვილი გვპასუხობს, რომ ორი თვის წინ შეუთანხმდა თეატრის აადმინისტრაციას და ახლა გადადება გამორიცხულია. მისი თქმით, კონცერტს ანსამბლის წევრების ახლობლებისა და ნათესავების გარდა დაესწრებიან ახალციხის მერიისა და გამგეობის წარმომადგენლები, ასევე სასულიერო პირები.

„გვქონდა სათანადო მიზეზი, რომ ეს კონცერტი ჩაგვეტარებინა. მაქვს გალობები, ნეკროლოგი, როგორც შეეფერება ამ დღეს, ამ მდგომარეობას ისე მოვიქცევით. ტაშფანდური არ მაქვს და დამოუკიდებლობის დღეს არ ავღნიშნავ. ეს არის შემაჯამაბელი, უნდა ნახონ მშობლებმა მთელი წლის განმავლობაში მათ შვილებმა რა გააკეთეს“, – ამბობს კოვზიაშვილი.

შეგახენებთ, რომ 13 ივნისის სტიქიის დროს დაღუპული მოქალაქეების გამო, საქართველოში 15 ივნისი გლოვის დღედ გამოცხადდა. ტელევიზიებმა ყველა გასართობი გადაცემები გადადეს. ბოლო მონაცემებით, სტიქიის დროს 14 ადამიანი გარდაიცვალა, ათამდე დაკარგულად ითვლება.

პ.ს. სტატიის გამოქვეყნების შემდეგ, "სამხრეთის კარიბჭეს" დაუკავშირდნენ ახალციხის მერიისა და გამგეობის საზოგადოებასთან ურთიერთობის სამსახურების წარმომადგენლები და განაცხადეს, რომ არც მერია და არც გამგეობა არანაირ კონცერტზე არ მიდის. მეტიც, მათ არც იცოდნენ ამ კონცერტის შესახებ და რომც სცოდნოდათ, ცხადია არ წავიდოდნენ. მერიაც და გამგეობაც მთელი დღეა დაზარალებულთა დასახმარებლად ნივთებისა და პროდუქტების შეგროვებითა და ამ საქმის ორგანიზებითაა დაკავებული.

[Sknews.ge]