ადიგენში ბიბლიოთეკის რეაბილიტაციისთვის 12.828 ლარი დაიხარჯება

ადიგენის მუნიციპალიტეტის გამგეობამ ბიბლიოთეკის შენობის რეაბილიტაციისთვის ტენდერი 17 ივნისს გამოაცხადა. გამარტივებულ ტენდერში მხოლოდ ერთი პრეტენდენტი, შპს „ახალი თაობა“ მონაწილეობდა. ელექტრონული ტენდერის დროს ძირითად დროში წარმოდგენილი თანხა არ შეცვლილა.

გამარჯვებული კომპანია ბიბლიოთეკის რეაბილიტაციას 12.828 ლარს მოახმარს. გარემონტდება შესასვლელი დარბაზი, დერეფანი, დირექტორის კაბინეტი და საპირფარეშო. შეიღებება კედლები და გამოიცვლება იატაკი. ცენტრალურ შესასვლელში მოეწყობა პანდუსი.

ადიგენის მუნიციპალიტეტის გამგეობამ გამარჯვებულ კომპანიასთან ხელშეკრულება 3 ივლისამდე უნდა გააფორმოს. სამუშაოები კი ხელშეკრულების გაფორმებიდან 20 კალენდარული დღის ვადაში უნდა დასრულდეს.

როგორც ადიგენის ცენტრალური ბიბლიოთეკის დირექტორი ეკა ბოჩიკაშვილი გვიხსნის, აღნიშნულ შენობაში ბიბლიოთეკა 2002 წლიდან გადავიდა და მას შემდეგ არ გარემონტებულა. ბიბლიოთეკაში დაახლოებით 21.000–მდე წიგნი ინახება.

[თინათინ ზაზაძე, ადიგენი]