ახალციხეში თაბუკაშვილის ქუჩა ფეკალური მასით იტბორება

თაბუკაშვილის ქუჩაზე მცხოვრებლები ამბობენ, რომ ეგრეთ წოდებული ძველი საავადმყოფოს დასახლებაში საკანალიზაციო ჭა არის გაჭედილი. ამის გამო, ყოველ დილით, მაშინ როდესაც დასახლებაში წყალი გამოდის, ამ ჭიდან წამოსული ნიაღვარი თაბუკაშვილის ქუჩას მოუყვება.

„კომუნისტების დროს ამ დასახლებაში მცხოვრებმა ერთ – ერთმა ოჯახმა უნებართვოდ, კუსტარულად გააკეთა საკანალიზაციო სისტემა და ამ ჭას მიუერთა, შემდეგ კიდევ რამდენიმე ოჯახმა მიუერთა. ხუთი წლის წინ პრობლემა არ იყო, მაგრამ ახლა უკვე გაჭედილია და ვეღარ ატარებს წყალს“, – ამბობს თაბუკაშვილის ქუჩაზე მცხოვრები აშოტ კავალერიანი და იმ ორ საკანალიზაციო ჭასთან მივყავართ, საიდანაც მათი ქუჩა იტბორბა. ჭიდან წყალი ახლაც მოდის, მთელს ქუჩასა და გზაზეც უსიამოვნო სუნია.

ადგილობრივები ინფექციის გავრცელების საშიშროებაზეც საუბრობენ: „დიდი დასახლებაა, უამრავი ბავშვი ცხოვრობს. ზაფხულში დილიდან საღამომდე გარეთ არიან და თამაშობენ. ეს ხომ საშიშია მათთვის?! ღმერთმა იცის რა ინფექციები შეიძლება გავრცელდეს. გარდა ამისა საშინელი სუნია, ფანჯრები ვერ გაგვიღია“, – ამბობენ თაბუკაშვილის ქუჩის მცხოვრებლები.

ადგილობრივები ამბობენ, რომ „საქართველოს წყალმომარაგების კომპანიის სამცხე – ჯავახეთის რეგიონულ ფილიალს“ რამდენჯერმე მიაკითხეს.

„პირადად მე რამდენჯერმე შევხვდი და ჩვენი პრობლემა მოვახსენე გია ბაგინაშვილს (წყალმომარაგების კომპანიის სამცხე-ჯავახეთის სერვისცენტრის მენეჯერი. ს.კ.). კომპანიის წარმომადგენლებმა ნახეს კიდეც, მაგრამ კერძო საკუთრებაა და ჩვენი გასაკეთებელი არ არის, თვითონ მოსახლოებამ უნდა გააკეთოსო“, – ამბობს აშოტ კავალერიანი.

„საქართველოს წყალმომარაგების კომპანიის“ სამცხე – ჯავახეთის რეგიონული ფილიალის მენეჯერმა გიორგი ბაგინაშვილმა „სამხრეთის კარიბჭესთან“ სატელეფონო საუბარში განაცხადა, რომ ამ პრობლემის შესახებ არ იცის. თუმცა, თუ აღნიშნული საკანალიზაციო სისტემა კერო პირს ეკუთვნის, კომპანია მას ვერ შეაკეთებს.

აშოტ კავალერიანი ამბობს, რომ გუშინ მან დასახმარებლად უკვე თბილისში, კომპანიის ცენტრალურ ოფისში დარეკა: „როგორც ჩანს, ღამე წყალმომარაგების კომპანიის თანამშრომლებმა ჭა დროებით შეაკეთეს, რადგან დღეს წყლის ნაკადს ფეკალიები აღარ გამოყვა, მაგრამ მერწმუნეთ, ორ დღეში იგივე მდგომარეობა იქნება. აღნიშნული ჭა ან საერთოდ უნდა გაუქმდეს ან შეკეთდეს ისე, რომ ჩვენ პრობლემა აღარ გვქონდეს“.

თაბუკაშვილის ქუჩის მცხოვრებლები დახმარების მოლოდინში არიან. მათ იმედი აქვთ, რომ ვიდრე ფეკალიებმოფენილი ეზოდან რამე ინფქცია გავრცელდება, მათი პრობლემით ვინმე დაინტერესდება.

„თუ კერძო პირების ვალდებულებაა, მაშინ მათ მოსთხოვონ შეკეთება, თუ არა, თავად შეაკეთონ. სახლში ვეღარ შევდივართ ქუჩიდან იმის შიშით, რომ ბაქტერიებს შევიყოლებთ. ბოტკინის გავრცელებას მეტი კი არაფერი უნდა. მოგვხედონ, მითუმეტეს, რომ აგერ ქუჩის ბოლოს რომ გახედო, ადმინისტრაციის შენობა გიყურებს“, - ამბობენ თაბუკაშვილის მცხოვრებლები.



[მანანა სარაშვილი, ახალციხე]