რუსთაველის ქუჩა ფეკალური მასით იტბორება

მთავარი → საზოგადოება 18.09.2013

ახალციხეში ასპინძის ქუჩის ჩასასვლელთან კანალიზაციის მილია გახეთქილი. ამ წუთებში მილიდან გადმოსული ნიაღვარი ასპინძისა და რუსთაველის ქუჩებზე მიედინება. დატბორილია მიმდებარე ტერიტორიაზე მცხოვრებთა ეზოებიც.

როგორც რუსთაველის N67-ში მცხოვრები ლია ზედგინიძე ამბობს, ნიაღვარი სამი საათისთვის არ იყო, თუმცა ამ დროისთვის მისი ეზო უკვე დატბორილია.

ასევე ფეკალური მასით ივსება ახალციხის ზრდასრულთა განათლების ცენტრის ეზოც.

საქართველოს გაერთიანებული წყალმომარაგების კომპანიის სამცხე-ჯავახეთის რეგიონული ფილიალში ავარიის შესახებ "სამხრეთის კარიბჭესგან" შეიტყვეს.

"ამ წუთებში ორი სამუშაო ჯგუფია გასული, ერთი 9 აპრილის, მეორე ასპინძის ქუჩაზე. აქაც ავარიებზე მუშაობენ, სადაც სასმელი წყლის მილია დაზიანებული. ზოგადად სისტემა ავარიულია და მწყობრიდან ხშირად გამოდის", - ამბობს საქართველოს გაერთიანებული წყალმომარაგების კომპანიის სამცხე-ჯავახეთის რეგიონული ფილიალის მენეჯერი გიორგი ბაგინაშვილი.

მან სამუშაო ჯგუფს რუსთაველის ქუჩაზე ავარიის შესახებ ინფორმაცია უკვე მიაწოდა და დაგვაიმედა, რომ აღნიშნული პრობლემა ძალიან მალე მოგვარდება.

შეგახსენებთ, რომ ამ ადგილას ასფალტი 31 აგვისტოს ძლიერი წვიმის შემდეგ ჩაინგრა. თუმცა, ამ დრომდე აქ კანალიზაციის მილი არ დაზიანებულა.

[sknews.ge]