კლდესა და წნისში სეტყვამ ხეხილის 15 პროცენტი დააზიანა

დღეს, 7 ივნისს, სეტყვის შედეგად დაზიანებულ სოფლებში ახალციხის მუნიციპალიტეტის გამგეობის თანამშრომლები მივიდნენ. ეკონომიკური განვითარებისა და ქონების მართვის სამსახურის უფროსის ნოდარ ტალახაძის განმარტებით, გუშინდელმა სტიქიამ წნისისა და კლდის მაცხოვრებლები დააზარალა.

„გამგებლის წარმომადგენლებს დავუკავშირდით და რომელი სოფლებიც დააზიანა სეტყვამ იქ წავედით. საკონსულტაციო ცენტრის თანამშრომლებთან ერთად დავიარე სოფლები. ნათესები დაზიანეული არ არის. წნისში და კლდეში ვიწრო ზოლზე იყო სეტყვა, დაზიანებულია ვაშლი, ტყემალი, ქლიავი, კაკალი და ყურძენი. საერთო ჯამში 15 პროცენტი“, - ამბობს ნოდარ ტალახაძე.

შეგახსენებთ, რომ ძლიერი წვიმა და ქარი გუშინ, 6 ივნისს, დაახლოებით 20:00 საათისთვის დაიწყო. წნისისა და კლდის გარდა სეტყვა იყო ახალციხეშიც, თუმცა დიდხანს არ გაგრძელებულა.

[თინათინ ზაზაძე, ახალციხე]