სამოქალაქო განათლების პროგრამამ ექვსთვიანი მუშაობა შეაჯამა

სამოქალაქო განათლების პროგრამის შუალედური ღონისძიება დღეს, 22 დეკემბერს ადგილობრივი თვითმმართველობის ადმინისტრაციის შენობაში გაიმართა. შეხვედრას პარტნიორი სკოლები, სკოლის დირექტორები, საგანმანათლებლო რესურსცენტრის, ადგილობრივი თვითმმართველობისა და არასამთავრობო ორგანიზაციების წარმომადგენლები, ასევე მშობლები და მედიის წარმომადგენლები დაესწრნენ.

„ჩვენი მიზანია სკოლებში სამოქალაქო განათლების სწავლების ხარისხის გამოუჯობესება და ნასწავლის პრაქტიკაში გამოყენების დანერგვა. გარდა ამისა, მოსწავლეების გააქტიურება და ჩართვა სამოქალაქო პროცესებში“, – ამბობს ახალციხის ახალგაზრდული ცენტრის დირექტორი მარინე სუდაძე.

სამოქალაქო განათლების პროგრამა – „მომავლის თაობა“ საქართველოს მასშტაბით 480 სკოლაში ხორციელდება, აქედან 42 სკოლა სამცხე–ჯავახეთშია.

პროგრამას ახორციელებს PH international–ი ამერიკის საერთაშორისო სააგენტოს USAID–ის ფინანსური მხარდაჭერით.

„მოსწავლეების მიერ წარმოდგენილი ინიციატივები ძალიან საინტერესოა, რომელიც დაიგეგმა კლასში მათი სამოქალაქო განვითარების პედაგოგის ხელმძღვანელობით. გრძელდება პარტნიორი სკოლების მხარდაჭერა. დაურიგდათ დამხმარე სახელმძღვანელოები, რომელიც მოსწავლეებისთვის არის გზამკვლევი, რომ მათ უფრო საინტერესო ინიციტივები განახორციელონ, ისეთ თემაზე, რაც აქტიურია მათი საზოგადოებისათვის“, – ამბობს სამოქალაქო განვითარების პროგრამის „მომავლის თაობა“ პროგრამის რეგიონული არასამთავრობო ორგანიზაციების ქსელის მენეჯერი თამარ ფრუიძე.

სამოქალაქო განვითარების პროგრამა „მომავლის თაობა“ 2014 წლიდან ხორციელდება. პროგრამა სამწლიანია.

[თინათინ ზაზაძე, ახალციხე]