დაბა ასპინძაში ორი ბაღი რემონტდება – პროექტის ღირებულება 900.000 ლარია

N 1 საბავშვო ბაღში სრულად შეიცვალა კარ–ფანჯარა და იატაკი, ეწყობა სათამაშო და საძინებელი ოთახები, სამზარეულო, სველი წერტილები, მიმდინარეობს გარე ფასადის მოპირკეთებაც. მომდევნო ეტაპზე დაგეგმილია ბაღის ახალი ავეჯით, სათამაშოებითა და საჭირო ინვენტარით აღჭურვა. ასევე კეთილმოეწყობა ეზო და საბავშვო გასართობი მოედანი.

კაპიტალური სარეაბილიტაციო სამუშაოები მიმდინარეობს N2 სკოლამდელი აღზრდის დაწესებულებაშიც. მუნიციპალიტეტის გამგებლის ლევან ცაბაძის ინფორმაციით, ბაღების რეაბილიტაციის შემდეგ დამატებითი ჯგუფების გახსნის შესაძლებლობა გაჩნდება: „რაც შესაბამისად ახალი სამუშაო ადგილების შექმნას გულისხმობს. ვგეგმავთ ასევე სპეციალური ტრანსპორტის დანიშვნას, რათა ახლომდებარე სოფლებიდანაც უზრუნველვყოთ ბავშვების ჩამოყვანა. გარდა ამისა გაიხსნება ინტეგრირებული ჯგუფი, სადაც არაქართული სოფლის, დამალის 80 -მდე პატარა ქართველ თანატოლებთან ერთად ისწავლის“.

რეაბილიტაციის შემდეგ დაბა ასპინძის სკოლამდელი აღზრდის დაწესებულებათა კონტიგენტი 250-დან 700 აღსაზრდელამდე გაიზრდება.

როგორც სამცხე–ჯავახეთის სამხარეო ადმინსტრაციაში ამბობენ, ბოლო ხანებში მხარის მასშტაბით, აშენდა 5 ახალი საბავშვო ბაღი, რეაბილიტაცია ჩაუტარდა 23 ბაგა-ბაღს, მოხდა მათი ინვენტარითა და სხვა საჭიროებებით უზრუნველყოფა. წლის ბოლომდე დასრულდება კიდევ 6 საბავშვო ბაღის რეაბილიტაცია. მათ შორის არის, ასპინძის მუნიციპალიტეტში - დაბა ასპინძის N1 და N2 საბავშვო ბაღები, ახალქალაქის მუნიციპალიტეტში - ქალაქ ახალქალაქის N2, N3, სოფლების კუმურდოსა და კარწახის საბავშვო ბაღები.


[sknews.ge]