ახალციხის 5 სკოლაში უატესტატოდ 19 მოსწავლე დარჩა, ერთი სკოლა კი მონაცემებს მალავს

ახალციხის მეხუთე საჯარო სკოლაში 101 მოსწავლიდან გამოსაშვებ გამოცდებზე მინიმალური ბარიერი ხუთმა მოსწავლემ ვერ გადალახა, მათგან ორს ინგლისური ენის გამოცდის ჩაბარება გაუჭირდა, ორს მათემატიკის, ხოლო ერთს რუსული ენის.

30 მოსწავლიდან 7–ს გაუჭირდა უცხო ენისა და მათემატიკის გამოცდა მეორე საჯარო სკოლაში.

მესამე საჯარო სკოლაში კი 35–დან ატესტატს 29 მოსწავლე აიღებს.
მხოლოდ ერთი მოსწავლე რჩება ატესტატის გარეშე ახალციხის მეექვსე საჯარო სკოლაში, სადაც გამოცდებს 26 მოსწავლე აბარებდა.

21 მეთორმეთეკლასელიდან 21–ვემ წარმატებით ჩააბარა გამოცდები ახალციხის კერძო სკოლა მზექაში.

პირველ საჯარო სკოლაში გამოსაშვებ გამოცდებს 98 მოსწავლე აბარებდა. ამათგან რამდენმა ჩააბარა წარმატებით, „სამხრეთის კარიბჭემ“ ინფორმაცია ვერ მოიპოვა.

ყველა რგოლმა (სკოლა, რესურსცენტრი, სამინისტრო), ვისაც მონაცემების დაზუსტება ვთხოვეთ, გამოცდების ეროვნულ ცენტრში გადაგვამისამართა. კერძოდ, სკოლის სასწავლო ნაწილმა მარინა მამუკაშვილმა გვითხრა, რომ ეს ინფორმაცია კონფიდენციალურია და გამოცდების ეროვნულ ცენტრს მივმართოთ. მონაცემები არ ჰქონდათ არც ახალციხის საგანმანათლებლო რესურსცენტრში. ასევე გამოცდების ცენტრში გადაგვამისამართა რესურსცენტრის უფროსმა ხათუნა ხმალაძემ. ეროვნული ცენრისკენ მიგვითითა საქართველოს განათლებისა და მეცნიერების სამინისტროს პრესსამსახურმა ნატა ასათიანმაც. გამოცდების ეროვნული ცენტრის საზოგადოებასთან ურთიერთობის სამაახურის წარმომადგენელმა თეიკო ანჯაფარიძემ კი გვითხრა, რომ ცენტრს კონკრეტული სკოლების მიხედვით ინფორმაცია არ აქვთ, აქვთ მხოლოდ ზოგადი მონაცემები და უკან, განათლების სამინისტროში გადაგვამისამართა.

შეგახსენებთ, საქართველოს მასშტაბით გამოსაშვებ გამოცდებზე დაახლოებით 44 ათასი მოსწავლე დარეგისტრირდა, იყვნენ ისეთებიც, რომლებიც წელს გამოცდას განმეორებით აბარებდნენ. 44.000–დან ნაწილი გამოცდებზე არ გამოცხადდა. განათლების სამინისტროს ინფორმაციით, ბარიერის გადალახვა მხოლოდ გამოცდაზე მისული მოსწავლეების 5%–ს, დაახლოებით 2 200 მოსწავლეს გაუჭირდა.



[მანანა სარაშვილი, ახალციხე]