ახალციხეში, გამოსაშვებ გამოცდებზე, 280-დან 42 მოსწავლე ჩაიჭრა

მეხუთე საჯარო სკოლაში 92 მოსწავლიდან გამოცდებზე 17 მოსწავლე ჩაიჭრა, ამათგან, 9-ფიზიკაში. სკოლის დირექტორის მოვალეობის შემსრულებლის ნანა დათაშვილის განმარტებით, ადმინისტრაციამ გადაწყვიტა გამოიკვლიოს რომელ მოსწავლეს რომელს საგანში უჭირს. მას შემდეგ რაც შედეგები გაირკვევა, მოსწავლეების ცოდნის დონის ამაღლების მიზნით მასწავლებლები დამატებითი გაკვეთილებს ჩაატარებენ.

„დავიწყეთ მიზეზების ძებნა. ვადარებთ მიმდინარე და მიღებული ქულებს. მოვახდენთ ანკეტირებას თუ რას თვლიან მოსწავლეები და პედაგოები დაბალი შედეგები მიზეზად და შემდეგ დავსახავთ ღონისძიებებს, ეს იქნება დამატებითი თუ ინდივიდუალური გაკვეთილების სახით“,- ამბობს დირექტორი.

მეორე საჯარო სკოლაში, სადაც ქართული და რუსული სექტორია, გამოცდებს 27 მოსწავლე აბარებდა. აქედან მინიმალური ზღვარი სამმა ვერ გადალახა.

„სამი მოსწავლიდან ორი დეპორტირებული მესხხია, მათ ჯერ კიდევ უჭირთ ქართულ ენაზე სწავლა. შედეგებით კმაყოფილი ვარ, წინა წლებისგან განსხვავებით, შედარებით ნაკლები მოსწავლე ჩაიჭრა“,- ამბობს იგი.

პირველ საჯარო სკოლაში, სადაც 82 მეთორმეტეკლასელია, მინიმალური ზღვარის გადალახვა 10 მოსწავლეს გაუჭირდა. მეექვსე საჯარო სკოლაში - 26 მოსწავლიდან სამს. კერძო სკოლა „მზექაში“ კი 16 მოსწავლიდან გამოცდა ყველამ ჩააბარა, თუმცა სკოლის პედაგოგები გამოცდების ელექტრონული ფორმით ჩაბარებას მაინც ეწინააღმდეგებიან.

„გამოცდის დროს დაიდო ისეთი კითხვები, რომელიც პროგრამაში არ ყოფილა. ძალიან ცუდი ტენდენციაა ის, რომ სკოლებს არ ენდობიან გამოცდის ჩატარებაში. გამოცდების ეროვნული ცენტრის ხელმძღვანელის განმარტებით, სკოლა იმიტომ არ ატარებს გამოცდებ, რომ პედაგოებმა ამ საგნებში სასერტიფიკაციო გამოცდების დროს დაბალი შეფასებები მიიღეს. ჩვენ ბევრი კითხვა გვაქვს. იგივე პედაგოგების მომზადებული ბავშვები არ არიან ეროვნულ გამოცდებს, რომ აბარებენ?! ეს არასწორი მიდგომაა. და კიდევ ერთი, იმ დრო , როდესაც ქვეყანას უჭირს და ბიუჯეტი დაბალია, რა საჭირო იყო ზედმეტი თანხის ხარჯვა იმ ზედამხდველებისთვის ვინც ამ გამოცდებს აკვირდებოდნენ?“,- კითხულობს კერძო სკოლა „მზექას“ სასწავლო ნაწილის გამგე, ქიმია-ბიოლოგიის მასწავლებელი მზია ლობჟანიძე.

ქალაქის სკოლებში მე-12 კლასის გამოსაშვებ გამოსაშვებს ჯამში 280 მოსწავლე აბარებდა. ამათგან, 42 ჩაიჭრა. შეგახსენებთ, გამოსაშვები გამოცდები 12 ოქტომბერს დაიწყო და 15 ოქტომბერს დასრულდა. მოსწავლები გამოსაშვებ გამოცდებს ორ ეტაპად აბარებენ. პირველ ეტაპზე მათ ტექნიკური საგნების: ქიმიის, ბიოლოგიის, ფიზიკის და გეოგრაფიის ჩაბარება მოუწიათ. იმ საგნების ჩაბარება, რომლებშიც მინიმალური ზღვარი ვერ გადალახეს, მეორე ეტაპზე დამატებით ოთხ საგანთან (ქართული,ისტორია , მათემატიკა, უცხოენა) ერთად გაზაფხულზე შეუძლიათ.

[თინათინ ზაზაძე, ახალციხე]