სოფელ ღორთუბანში სკოლის შენობა მთლიანად დაიწვა

შემთხვევა გუშინ, 10 ივნისს მოხდა. სკოლას ხანძარი გამთენიისას გაუჩნდა, იმ დროისთვის შენობაში არავინ იმყოფებოდა. ხანძრის ლიკვიდაციაზე ადიგენისა და ახალციხის სახანძრო სამსახურები დილამდე მუშაობდნენ.

ადიგენის მუნიციპალიტეტის საგანმანათლებლო რესურსცენტრის უფროსის მოვალეობის დროებით შემსრულებლის შორენა ჭიტაძე – ლობჯანიძის განმარტებით, მთლიანადაა განადგურებული სკოლის შენობა და ინვენტარი. ამ ეტაპზე სასწავლო პროცესი შეჩერებულია. მომხდარის შესახებ ინფორმირებულია საქართველოს განათლებისა და მეცნიერების სამინისტრო.

ღორთუბნის სკოლა საბაზო საფეხურისაა. სკოლაში 37 მოსწავლე და 12 პედაგოგია.

როგორც ადიგენის მუნიციპალიტეტის გამგეობაში განმარტავენ, შემთხვევის ადგილზე ღამითვე მივიდნენ ადგილობრივი ხელისუფლების წარმომადგენლები.

საქართველოს შინაგან საქმეთა სამინისტროს განმარტებით, საქმეს ადიგენის რაიონული სამმართველო სსკ-ის 187 -ე მუხლით იძიებს, რაც ნივთის დაზიანებას ან განადგურებას გულისხმობს.

რას აპირებს განათლების სამინისტრო და რა ბედი ელით მოსწავლეებს – "სამხრეთის კარიბჭე" თემაზე მუშაობას აგრძელებს და მოვლენათა განვითარების შესახებ აუცილებლად მოგითხრობთ.

[sknews.ge]