ხანძრის შედეგად დამწვარი სკოლა ღორთუბანში [Photo]

სოფელ ღორთუბნის საჯარო სკოლას, ცეცხლი დაახლოებით დილის 4 საათზე გაუჩნდა. 2008 წელს აშენებული შენობა მთლიანად განადგურდა.



შემთხვევას მსხვერპლი არ მოჰყოლია. ალმოდებული შენობიდან ვერაფრის გამოტანა შეძლეს.


მთლიანად დაიწვა სასკოლო ინვენტარი: კომპიუტერები,ტელევიზორი, წიგნები, თვალსაჩინო მასალა და მერხები.



საჯარო სკოლაში მოსწავლეები სამი სოფლიდან: ღორთუბნიდან, აფიეთიდან და ზედუბნიდან დადიოდნენ.



შემთხვევის ადგილზე, დილამდე მუშაობდა ახალციხისა და ადიგენის სახანძრო–სამაშველო სამსახურები. ადგილობრივების განმარტებით ხანძარი სავარაუდოდ სადენებიდან გაჩნდა, იმის გამო, რომ შენობა ხის იყო, ცეცხლი მალე მოედო და დაახლოებით 5 წუთში მთლიანად დაიწვა.



საქართველოს შინაგან საქმეთა სამინისტროს განმარტებით, საქმეს ადიგენის რაიონული სამმართველო სსკ-ის 187 -ე მუხლით იძიებს, რაც ნივთის დაზიანებას ან განადგურებას გულისხმობს.



[თინათინ ზაზაძე, ოთარ აწყურელი, ადიგენი]