სოფელ ღორთუბანში გაკვეთილები საცხოვრებელ სახლში ტარდება

ღორთუბნის საჯარო სკოლის მასწავლებლის მარინა რეხვიაშვილის განმარტებით, დროებით გაკვეთილებს შენობის მეორე სართულზე ჩაატარებენ, პირველ სართულზე კი ბინის მესაკუთრე იცხოვრებს.

„პატარა სივრცე არ არის. რესურსცენტრიდან და ინფრასტრუქტურიდან იყვნენ, შეამოწმეს. როგორც დირექტორმა თქვა ,ახალი სკოლა აუცილებლად აშენდება“, – ამბობს მარინა რეხვიაშვილი.

სკოლის დირექტორი რომან მარკოიძე გვარწმუნებს, რომ მომავალ წელს სოფელს ახალი სკოლა ექნება: „უკვე დაგეგმილია, მომავალი წლისთვის შენობა დასრულებული იქნება“.

ახალი შენობის აშენებას ადასტურებენ განათლების სამინისტროშიც: „იმავე ადგილზე აშენდება ახალი სკოლა“.

შეგახსენებთ, რომ ადიგენის მუნიციპალიტეტის სოფელ ღორთუბანში სკოლა მიმდინარე წლის 10 ივნისს, ღამით დაიწვა. ხანძრის შედეგად მთლიანად განადგურდა შენობა და ინვენტარი.

ამ დროისთვის ღორთუბნის საჯარო სკოლაში 37 მოსწავლე სწავლობს.

[თინათინ ზაზაძე, ახალციხე]