ვალეში სკოლის შენობას ხანძარი გაუჩნდა

როგორც ახალციხის სახანძრო-სამაშველო სამსახურში განმარტავენ, ამ დროისთვის ხანძარი ლოკალიზებულია.

ახალციხის სახანძრო-სამაშველო სამსახურში ხანძრის შესახებ შეტყობინება 17:25 საათზე შევიდა. შემთხვევის ადგილზე სახანძრო სამსახურის ვალეს ბრიგადა გავიდა, მალევე მანქანა ახალციხიდანაც გაიგზავნა.

„თბილისიდან რომ შემოვიდა შეტყობინება, მაშინვე გადავეცით ვალის ბრიგადას და რამდენიმე წუთში მივიდნენ. ამ დროისთვის ცეცხლი უკვე ლოკალიზებულია“, - განმარტავენ ახალციხის სახანძრო-სამაშველო სამსახურში.

მეხანძრეების თქმით, ოთახში საკანცელარიო ნივთები დაიწვა. შემთხვევას მსხვერპლი არ მოჰყოლია.

ვალეს რწმუნებულის ელიოზ ბარბლიშვილის განმარტებით, ხანძარი სავარაუდოდ ელექტროსადენებისგან გაჩნდა. დამწვარია შენობის ერთი ოთახი.

შსს-ს პრესსამსახურში განმარტავენ, რომ აღნიშნულთან დაკავშირებით გამოძიება სისხლის სამართლის კოდექსის 187-ე მუხლით მიმდინარეობს. რაც ნივთის დაზიანებას ან განადგურებას გულისხმობს.

[sknews.ge]