ჩუნჩხის დამწვარი სკოლის მოსწავლეები დროებით სხვა შენობაში სწავლობენ [Photo/Video]

გამგებლის წარმომადგენელი სოფელ ჩუნჩხაში, გიორგი ზედგინიძე ამბობს, რომ ადმინისტრაციულ შენობაში საკმარისი ოთახებია იმისთვის, რომ მოსწავლეებმა სწავლა შეძლონ: „სამედიცინო პუნქტს ორი ოთახი ეკავა და დროებით ერთ ოთახში განვათავსეთ. ბავშვები სწავლას შეძლებენ“.

ახალქალაქის საგანმანათლებლო რესურსცენტრის ხელმძღვანელის ტერეზა ჩიფჩიანის განმარტებით, დაიწყებს თუ არა ახალი სკოლის აშენებას განათლების სამინისტრო, ჯერ გადაწყვეტილი არ არის: „ჯერ არ ვიცით რა გადაწყდება. მთავარია მოსწავლეები კარგ პირობებში არიან“.
შეგახსენებთ, რომ 1 ნოემბერს ხანძრის შედეგად მთლიანად დაიწვა ახალქალაქის მუნიციპალიტეტის სოფელ ჩუნჩხის საჯარო სკოლის ის შენობა, სადაც დაწყებითი კლასის მოსწავლეები სწავლობდნენ. ხანძრის შედეგად არავინ დაზარალებულა. განადგურდა ახალი მერხები, ლაბორატორია და ზამთრისთვის მომარაგებული შეშა.




აღნიშნულ სკოლაში მეორე წელია პტენის საჯარო სკოლის მოსწავლეებიც დადიან.

„ავარიულია პტენის სკოლა. როგორც მე ვიცი, ამ სოფელში ახალი შენობა შენდება, საპროექტო სამუშაოები დაწყებულია“, – ამბობს ტერეზა ჩაფიჩიანი.

ჩუნჩხის საჯარო სკოლაში 78 მოსწავლე სწავლობს, ხოლო პტენის სკოლაში 32.

აღნიშნულთან დაკავშირებით, განათლებისა და მეცნიერების სამინიტრომ განცხადება გაავრცელა, რომელშიც ნათქვამია, რომ ხანძრის გამო სასწავლო პროცესი არ შეფერხებულა.

„მიმდინარე წლის 1 ნოემბერს ხანძრის შედეგად დაიწვა ახალქალაქის მუნიციპალიტეტის სოფელ ჩუნჩხის საჯარო სკოლის დამხმარე ხის შენობა, სადაც განთავსებული იყო სკოლის სამი საკლასო ოთახი, სკოლის ბიბლიოთეკა და საბუნებისმეტყველო ლაბორატორია. ხანძრის შედეგად დაიწვა და განადგურდა წიგნები და ლაბორატორიაში არსებული ინვენტარი.

იმისათვის, რომ 2 ნოემბერს სასწავლო პროცესი შეუფერხებლად წარმართულიყო, საგანმანათლებლო რესურსცენტრის უფროსმა მოიძია ალტერნატიული ფართი, რომელიც მუნიციპალიტეტის გამგეობამ სკოლას უსასყიდლოდ გამოუყო. აღნიშნულ რეაბილიტირებულ შენობაში სკოლას დაეთმო 4 ოთახი - 3 ოთახში განთავსდა სკოლის დაწყებითი კლასები, სულ 9 მოსწავლე და ერთ ოთახში მოეწყო სამასწავლებლო, შენობაში შეტანილია ყველა საჭირო ინვენტარი (მერხები, დაფები და ა.შ.). სასწავლო პროცესი მიმდინარეობს შეუფერხებლად, როგორც სკოლის ძირითად შენობაში, ასევე გამგეობის მიერ გამოყოფილ ალტერნატიულ ფართში. სასწავლო პროცესის ეფექტიანად წარმართვისთვის ყველა პირობა შექმნილია“, – ვკითხულობთ განათლების სამინისტროს განცხადებაში.





[თინათინ ზაზაძე, ახალქალაქი]