‘თავზე მაწვიმს’ – ახალდაბაში 80 წლის ქალი დახმარებას ითხოვს

ეთერ ქიმერიძის ერთსართულიანი სახლი სამი ათეული წელია ავარიულია, დაზიანებულია კედლები და ჩავარდნილია იატაკი. განსაკუთრებით რთული მდგომარეობა სახურავზეა, დამტვრეული „შიფერიდან“ ოთახებში წყალი ჩადის და ჭერიდან ბათქაში ცვივა.

„ახლა არაუშავს, მაგრამ ზამთარში გაუსაძლისია. ჭერი ისეა ჩამონგრეული, რომ ოთახებს ვეღარ ვათბობ. ბორჯომის მერს შევხვდი, წერილიც მივიტანე, დამპირდა აუცილებლად დაგეხმარებიო, მაგრამ ერთი წელი გავიდა და არავინ გამოჩენილა. სოფლის რწმუნებულმა მითხრა კიდევ ერთხელ მიდი მერიაშიო. 80 წლის ქალს ამდენი სად შემიძლია, ვეღარ დავდივარ“, – ამბობს ეთერ ქიმერიძე.

მისი შემოსავალი პენსია და სოციალური დახმარება 40 ლარია: „ეს წამლებში და საკვებში მეხარჯება, იმდენი ფული არ მაქვს სახურავი რომ შევცვალო“.

ბორჯომის მუნიციპალიტეტის მერიაში აცხადებენ, რომ მიმდინარე წლის ბოლომდე ეთერ ქიმერიძეს დაეხმარებიან: „ჩვენი რესურსებით გადავუხურავთ სახლს, ოღონდ ეს მეორადი სახურავი იქნება“.







[თინათინ ზაზაძე, ბორჯომი]