სამცხე-ჯავახეთში 1000-მდე აბონენტს დენი არ აქვს

გუშინ, 3 დეკემბერს, საღამოს და დღეს, 4 დეკემბერს, დილით უამინდობის გამო ელექტროენერგია სამცხე-ჯავახეთის დაახლოებით 10 ათას აბონენტს არ მიეწოდებოდა.

„ენერგო-პრო ჯორჯიას“ სამხრეთ საქართველოს საზოგადოებასთან ურთიერთობის სპეციალისტის გიორგი ბალახაშვილის განმარტებით, გუშინდელიდან მოყოლებული მათი ტექნიკური ბრიგადები დაზიანების ადგილებზე მუშაობენ. ამ დროისთვის ავარიების დიდი ნაწილი აღმოფხვრილია.

„ამ ეტაპზე ახალქალაქში 250 აბონენტია დარჩენილი დენის გარეშე. ახალციხეში 70 აბონენტს არ მიეწოდება ელექტროენერგია, ბორჯომში კი 600-მდე აბონენტს, აქ ანძაა მოტეხილი და უკვე რემონტდება. სხვა რაიონებში ელექრტოენერგიის მიწოდება შეზღუდული არ არის“, - განმარტავს გიორგი ბალახაშვილი და ამატებს, რომ დღის ბოლომდე, თუ ახალი დაზიანებები არ წარმოიშვა, მაქსიმუმს გააკეთებენ იმისთვის, რომ დენის მიწოდება ყველა აბონენტს აღუდგეს.

[თამარ თოთაძე, ახალციხე]