საგზაო მოძრაობის წესებს არდამორჩილებული სამთავრობო მანქანები?!

25 მაისს, ქალაქ ახალციხის საკრებულოს სხდომაზე მერიის ინიციატივას ააიპ-ის შექმნაზე, რომელმაც ახალციხის ხელოვნურ ტბაზე უნდა იზრუნოს, უმცირესობის პროტესტი მოჰყვა. ახალციხის მერს, გიორგი კოპაძეს, რომელიც სხდომას ესწრებოდა, უმცირესობის პროტესტი არ გაჰკვირვებია.

„თქვენი წინააღმდეგობა მესმის, თქვენ ხომ უნდა გქონდეთ სალაპარაკო“, – მიმართა მერმა უმცირესობას, რამაც სხდომა მოულოდნელად სხვა თემაზე გადართო. „ერთიანი ნაციონალური მოძრაობის“ დეპუტატმა ზურაბ სადათიერაშვილმა მერს ფურცელზე ამობეჭდილი ფოტო დაუდო და განაცხადა: „ჩხუბი მიზეზი რომ იყოს და გამოსაქვეყნებლად რომ მინდოდეს, მაშინ ეს ნახეთ“.

ფოტოზე ასახულია სამი ჯიპი, რომლებიც დღის საათებში, ქალაქის ცენტრალურ ქუჩაზე, საგზაო მოძრაობის წესების დარღვევით დგას, იქვე ახლოს ჩანან ადამიანები, რომლებიც სავარაუდოდ ამ ავტომობილებიდან არიან გადმოსული და საუბრობენ.

„კი ვნახე და შენ რა გგონია, არ არის ამის შესახებ საქმის კურსში ჩაყენებული ვინც საჭიროა?! შენ ეს სურათი საიდან მოიპოვე?“ – ჰკითხა მერმა დეპუტატს.

ზურაბ სადათიერაშვილმა კი უპასუხა, რომ ფოტო 18 მაისს თავად გადაიღო.

„ხოდა სხვებმაც გადაიღეს და წასულია ეგ სადაც საჭიროა“– განაცხადა ქალაქის მერმა.

ფოტოს ავტორი, ზურაბ სადათიერაშვილი, ვერ აკონკრეტებს ვის ეკუთვნოდა აღნიშნული მანქანები. მისი ვარაუდით, ავტომობილებით ძალოვანი უწყების წარმომადგენლები იყვნენ და ისინი პატრულს არ დაუჯარიმებია: „ადმინისტრაციული შენობის წინ, ხალხმრავალ ადგილას, ავტომობილების სავალ ნაწილზე სამი ჯიპი იყო გაჩერებული. კერძო პირები ნამდვილად არ იყვნენ, რადგან პატრული მოძრაობდა და დააჯარიმებდა. პირებს, რომლებიც მანქანების გარშემო ტრიალებდნენ, იარაღი ჰქონდათ თან“.

ახალციხის მერი ფოტოზე ასახულ ფაქტზე პასუხისმგებლობას იმ მოტივით იხსნის, რომ ქალაქში მოძრაობის წესებს მერია არ არეგულირებს. „სამხრეთის კარიბჭესთან“ ამბობს, რომ ისინი ვისაც ეს საკითხი ეხებათ, ამ ფაქტის შესახებ ინფორმირებული არიან.

„მე როგორც ვიცი, ვინც უნდა იცოდეს ამის შესახებ ყველამ იცის“, – აღნიშნა გიორგი კოპაძემ სხდომის დასრულების შემდეგ ჟურნალისტებთან საუბარში.

ნამდვილად ეკუთვნოდა თუ არა აღნიშნული მანქანები შსს–ს სამცხე– ჯავახეთის სამხარეო სამმართველოს წარმომადგენლებს და რატომ არ მოახდინა რეაგირება საპატრულო პოლიციამ საგზაო წესების დარღვევაზე, "სამხრეთის კარიბჭე" შინაგან საქმეთა სამინისტროსგან პასუხს ორი დღის განმავლობაში ელოდებოდა. თუმცა, შსს–ს ამ ფაქტზე კომენტარი ამ დრომდე არ გაუკეთებია.

[თამარ თოთაძე, ახალციხე]