ენმ ახალციხის ოფისთან გამართული აქცია საკრებულოს სხდომაზე განიხილეს

ქალაქ ახალციხის მუნიციპალიტეტის საკრებულოს სხდომაზე, რომელიც დღეს, 21 ოქტომბერს გაიმართა „ერთიანი ნაციონალური მოძრაობის“ დეპუტატებმა უმრავლესობის წევრებს მოუწოდეს, რომ გამოფხიზლდნენ და იგრძნონ ხელისუფლებაში ყოფნა.

„ასეთი პრეცენდენტი, რომ ოპოზიციას ოფისის კარი აუჭედო, მსოფლიოში არ ხდება, ეს მარტო საქართველოშია. ვერ გააცნობიერა „ქართულმა ოცნებამ“, რომ მოვიდა ხელისუფლებაში“, – ამბობს მალხაზ გიქოშვილი და ამატებს, რომ ხელისუფლების არცერთი დაპირება შესრულებული არ არის, ამიტომ სხვა აღარაფერი დარჩენიათ და „გამოყრიან ისევ იმ კადრებს“, – „რით ვერ გამოიძიეს, რით ვერ დასაჯეს, ამაზე ხომ არავინ პროტესტს არ აცხადებს. ყოველ სამ წელიწადში ეს კადრები გამოყარო და დააპირისპირო ქართველი ხალხი, მაშინ სახელმწიფო რაღაში გვჭირდება“.

„ერთიანი ნაციონალური მოძრაობის“ დეპუტატების თქმით, აქცია ახალციხელებს არ გაუმართავთ, თუმცა იქ რამდენიმე ადგილობრივიც დააფიქსირეს. მათ შორის ერთ–ერთი ახალციხის მერის რწმუნებულის შვილი.

„ძირითადად იყვნენ ბორჯომიდან ჩამოსული ხალხი, თუმცა იყვნენ ახალციხელებიც, მათ შორის ერთ–ერთი თქვენი რწმუნებულის შვილი იყო, ეს დაფიქსირებულია ვიდეოზეც, როგორ აცილებს ამ შენობის კუთხიდან თავის შვილს და კიდევ სამ ბიჭს აქციაზე. ყველანაირად ვცდილობ, რომ ვიყო კონსტრუქციული. თქვენ ვერ იტყვით, რომ ვერ აკონტროლებთ სიტუაციას, თუ ვერ აკონტროლებთ, მაშინ ხელისუფლებაშიც არ უნდა იყოთ“, – მიმართა უმრავლესობის წარმომადგენლებს „ერთიანი ნაციონალური მოძრაობის“ დეპუტატმა მალხაზ გიქოშვილმა.

ქალაქ ახალციხის მერის გიორგი კოპაძის თქმით, ხელისუფლება ამ შემთხვევაში არაფერ შუაშია და ადგილობრივი თვითმმართველობა ისევე დადგა ფაქტის წინაშე, როგორც „ერთიანი ნაციონალური მოძრაობა“.

„არ ვიცი ვინ მონაწილეობდა, მაგრამ ფაქტია, რომ ჩვენ არ ვიყავით. ერთს გეტყვით, ჩვენ რომ მიგვეღო მონაწილეობა, „ქართულ ოცნებას“, გაცილებით მეტი ხალხი იქნებოდა და უფრო ორგანიზებული იქნებოდა. ეს იყო არაორგანიზებული, მაგრამ იყო ჯანსაღი პროტესტი, ახალგაზრდები იყვნენ, ალბათ ის ადამიანები, ვისაც სურვილი ჰქონდა რომ გაეპროტესტებინა“, – განაცხადა „სამხრეთის კარიბჭესთან“ ქალაქის მერმა გიორგი კოპაძემ.

„ერთიანი ნაციონალური მოძრაობის“ დეპუტატების თქმით, ამ აქციით ხელისუფლებამ პიარი გაუკეთა მათ პარტიას, ამისთვის მათ უმრავლესობის წარმომადგენლებს მადლობაც კი გადაუხადეს.

შეგახსენებთ, 19 ოქტომბერს, "ერთიანი ნაციონალური მოძრაობის" ახალციხის რაიონულ ორგანიზაციასთან ტრანსფარანტებითა და შეძახილებით: „'SOS ლიკვიდირებული ენმ', 'გაქრით მწამებლებო', უნდა წავიდნენ საქრთველოდან ეს გარეწრები', 'ნაციონალებო გადაშენდით', 'გამოდით თქვე კურდღლებო', 'გაეთრიეთ აქედან', 'რუსთავი–2 –დამპალი მიშას მონები, 30–მდე მოქალაქემ აქცია გამართა. აქციის მონაწილეები შეძახილებით პარტიის წევრებს მიმართავდნენ, შემდეგ კი ოფისის შესასვლელი კარი აჭედეს, წარწერით: "SOS, ლიკვიდირებულია".

[თამარ თოთაძე, ახალციხე]