დაჯარიმდნენ თუ არა მოძრაობის წესების დამრღვევი პოლიციის მანქანები – შსს–ს განმარტება

„სამხრეთის კარიბჭემ“ საქართველოს შინაგან საქმეთა სამინისტროს შესაბამისი კითხვებით მიმართა და ასეთი პასუხი მიიღო:

„საგზაო მოძრაობის შესახებ“ საქართველოს კანონის 51-ე მუხლის პირველი პუნქტის თანახმად ოპერატიული ან სპეციალური სამსახურის სატრანსპორტო საშუალების მძღოლს, რომელსაც სატრანსპორტო საშუალებაზე ჩართული აქვს ლურჯი მოელვარე სპეციალური ციმციმა სიგნალი და ასრულებს სამსახურებრივ დავალებას, შეუძლია საგზაო მოძრაობის უსაფრთხოების უზრუნველყოფის პირობების დაცვით გადაუხვიოს კანონით განსაზღვრულ კონკრეტულ მოთხოვნებს.

ასევე, „საქართველოს შინაგან საქმეთა სამინისტროს საპატრულო პოლიციის სამსახურის მიერ პატრულირების განხორციელების წესების შესახებ” ინსტრუქციის დამტკიცების თაობაზე“ საქართველოს შინაგან საქმეთა მინისტრის 2005 წლის 15 დეკემბრის №1310 ბრძანების მე-14 მუხლის პირველი პუნქტის „გ“ ქვეპუნქტის საფუძველზე საქართველოს შინაგან საქმეთა სამინისტროს სტრუქტურული ქვედანაყოფის - საპატრულო პოლიციის მოსამსახურეებს უფლება აქვთ, საგზაო მოძრაობის უსაფრთხოების უზრუნველყოფის მიზნით, გადაუხვიონ საგზაო მოძრაობის ცალკეულ წესებს.

საქართველოს შინაგან საქმეთა სამინისტროს სარგებლობაშია როგორც სპეციალური შეფერილობის მქონე, ასევე ჩვეულებრივი შეფერილობის ავტომანქანები, რომელთაც, ოპერატიული საქმიანობიდან გამომდინარე, არ აქვთ განმასხვავებელი ნიშანი.

შესაბამისად, „საქართველოს შინაგან საქმეთა სამინისტროს საპატრულო პოლიციის სამსახურის მიერ პატრულირების განხორციელების წესების შესახებ” ინსტრუქციის დამტკიცების თაობაზე“ საქართველოს შინაგან საქმეთა მინისტრის 2005 წლის 15 დეკემბრის №1310 ბრძანებით გათვალისწინებული გამონაკლისი ვრცელდება ჩვეულებრივი შეფერილობის ავტომანქანებზეც“, – ვკითხულობთ პასუხში.

„სამხრეთის კარიბჭემ“ მოძრაობის წესების, უფრო კონკრეტულად, პარკირების წესის დარღვევის ამსახველი პირველი ფოტო გასული, 2015 წლის 13 დეკემებრს გადაიღო, ბოლო კი 2016 წლის 9 აპრილს.

5 შემთხვევიდან ორში, წესს პოლიციის პიკაპი არღვევს, სამ შემთხვევაში კი არასწორად შსს სამცხე–ჯავახეთის პოლიციის დეპარტამენტის კუთვნილი ავტომანქანაა დაპარკინგებული. 5 შემთხვევიდან 4 დღის განმავლობაშია გადაღებული, 1 კი გვიან საღამოს. 2 შემთხვევაში წესს ერთი და იგივე ავტომობილი არღვევს, სამცხე–ჯავახეთის პოლიციის დეპარტამენტის კუთვნილი ავტომანქანა, სახელმწიფო ნომრით: SH-011-SS.

საინტერესოა ისიც, რომ სამ შემთხვევაში, ფოტოზე ჩანს საპატრულო პოლიციის მანქანაც, რომელსაც დარღვევაზე რეაქცია არ აქვს.



[ვარლამ წიკლაური, ნინო ნარიმანიშვილი, ახალციხე]