ახალციხეში ევროპის კვირეული გაიხსნა

ევროპის კვირეული ახალციხეში ოფიციალურად ქალაქ ახალციხის მერმა გიორგი კოპაძემ გახსნა.

„ევროპის კვირეული თითქმის ყველა ქალაქში ტარდება და ჩვენც ვუერთდებით ამ პროცესებს.ძალიან მნიშვნელოვანია ახალგაზრდების მონაწილეობა ამ კვირეულში, ევროპა არის ჩვენი გადარჩენის გზა, მე ასე ვხედავ“, – ამბობს გიორგი კოპაძე.

ღონისძიებაზე სამცხე – ჯავახეთის სახელმწიფო უნივერსიტეტის სტუდენტმა „გავაცნოთ ევროკავშირი სკოლებს“ პროექტის პრეზენტაცია გამართა.

ახალციხეში ევროპის კვირეული ქალაქ ახალციხის მუნიციპალიტეტის მერიის კულტურის სამსახურის ორგანიზებით იმართება. პროექტის ავტორი კი სამოქალაქო განათლების პედაგოგთა რეგიონული კოორდინატორი ნინო ნადირაძეა.

„2014 წელს ნატოს საინფორმაციო ცენტრის, მასწავლებლის სახლისა და განათლების სამინისტროს ორგანიზებით ჩატარდა ორდღიანი სემინარი, სადაც განხილული იყო ყველა ის საკითხი რაც ევროკავშირს უკავშირდება. შემდეგ მოგვეცა დავალება, რომ დაგვეწერა პროექტები. 82 პროექტიდან 10 შეირჩა, მათ შორის ჩვენიც. ახლა მომეცა საშუალება, რომ ეს პროექტი განვახორციელო“, – ამბობს ნინო ნადირაძე.

ნინო ნადირაძემ ადგილობრივი თვითმმართველობის წარმომადგენლებს, პედაგოგებს, მოსწავლეებსა და სტუდენტებს ევროპის კვირეულის ფარგლებში დაგეგმილი ღონისძიებები გააცნო. კვირეულში მონაწილეობას მიიღებენ ახალციხის ყველა საჯარო და კერძო სკოლის მოსწავლეები, ასევე სამცხე – ჯავახეთის სახელმწიფო უნივერსიტეტის სტუდენტები და მერიის ახალგაზრდული საბჭოს წევრები.

ევროპის კვირეულის ფარგლებში გაიმართება ტრეინინგები ევროკავშირის თემაზე, ჩატარდება „რა, სად როდის“, „ფორტი ბოიარდი“, ასევე ევროკავშირის თემაზე გამოცხადდება ესეების კონკურსი და გაიმართება ფლეშმობი.

ევროპის კვირეული ახალციხეში 30 მაისის ჩათვლით გაგრძელდება.



[მანანა სარაშვილი, ახალციხე]