საქართველოში ‘კლიმატის ცვლილებების კვირეული’ მიმდინარეობს

საქართველოში კლიმატის ცვლილებების კვირეული დღეს, 27 სექტემბერს დაიწყო და ოთხ ოქტომბრამდე გაგრძელდება.

კვირეულის ფარგლებში, ახალციხის საზოგადოებრივი განვითარების ცენტრმა სემინარი ჩაატარა, ადგილობრივი საჯარო მოხელეებისთვის, ვინც ამ მიმართულებით მუშაობენ. შეხვედრა ახალციხის დემოკრატიული ჩართულობის ცენტრში გაიმართა.

შეხვედრაზე საუბარი იყო, ენერგიის დაზოგვაზე განახლებადი ენერგიებით, როგორც მზის კოლექტორების გამოყენებით, ასევე ბიოგაზით და სხვა.

„ახალციხე, ენერგოეფექტურობის მხრივ, საკმაოდ დაწინაურებულია. ჩვენი მიზანია, რეგიონი კიდევ უფრო დაწინაურდეს, მოსახლეობაც გააქტიურდეს და წვლილი შეიტანონ ჩვენი ენერგოეფექტურობის გაუმჯობესებაში და ეს ყველაფერი მხოლოდ იმ ადამიანებზე არ იყოს დამოკიდებული, ვინც ამ სფეროში არიან ჩართულნი“, – გვითხრა სემინარის ორგანიზატორმა და ახალციხის საზოგადოებრივი განვითარების ცენტრის თავმჯდომარემ ნუგზარ თათეშვილმა.

„კლიმატის ცვლილებების კვირეულის“ ფარგლებში, მოეწყო ახალციხის პირველი საჯარო სკოლის მოსწავლეების ნახატების გამოფენაც. მოსწავლეებმა ფურცლებზე გადაიტანეს თავიანთი ხედვა, თუ რა კლიმატური ცვლილებები მიმდინარეობს დედამიწაზე.

საქართველოში „კლიმატური ცვლილებების კვირეულს“, ახალციხის გარდა, კიდევ 11 ქალაქი შეუერთდა, რომლებიც კლიმატის ცვლილების თემაზე სხვადასხვა ღონისძიებებს აწყობენ.



[ლუბა გიორგაძე, ახალციხე]