16-დან 22 აპრილის ჩათვლით ბიბლიოთეკების კვირეული გაიმართება

კვირეულის დევიზია: „საინფორმაციო ტექნოლოგიები – ჩემი ბიბლიოთეკის მოდერნიზაცია!“

კვირეულის ფარგლებში საქართველოს ბიბლიოთეკები სხვადასხვა ტიპის საჯარო ღონისძიებებს უმასპინძლებენ: გამოფენებს, ლიტერატურულ საღამოებს, წიგნების პრეზენტაციებს, შეხვედრების სერიებს მწერლებთან, პოლიტიკოსებთან და სხვა საინტერესო პიროვნებებთან.

აგრეთვე ჩატარდება კონკურსები, სემინარები, დისკუსიები, საქველმოქმედო აქციები და სხვა. კვირეულის პერიოდში ბიბლიოთეკარები ერთმანეთს თავიანთ გამოცდილებას უზიარებენ, ერთობლივად ეძებენ და ჭრიან საერთო პრობლემებს, აგრეთვე, ჯამდება გასული წლის განმავლობაში განხორციელებული ახალი პროექტები.

ღონისძიებაზე წარმოდგენილი იქნება: წიგნი “პოეტი ბიბლიოთეკარი”, რომელიც ჩვენი ბიბლიოთეკარების თხოვნით შეიქმნა; დარბაზში გაიხსნება შემოქმედი ბიბლიოთეკარების გამოფენა.

აგრეთვე დაჯილდოვდებიან საქართველოს პარლამენტის ეროვნული ბიბლიოთეკის თანამშრომლები.

კვირეულის დახურვა შედგება 22 აპრილს, ეროვნული ბიბლიოთეკის საკონფერენციო დარბაზში, სადაც გაიმართება პრეზენტაციების კონკურსი თემაზე „საინფორმაციო ტექნოლოგიები – ჩემი ბიბლიოთეკის მოდერნიზაცია“.

[sknews.ge]